समाचारहरू

चौरजहारी नपा-२ का ३२ वर्षीय महेशकुमार आर्चायलाई प्रहरीले सामान्य विवादमा गिरफ्तार गरी यातना दिएको भन्दै पीडितका बुवा ५२ वर्षीय शरण आर्चायले राष्ट्रिय मानव अधिकार आयोगको क्षेत्रीय कार्यालय नेपालगञ्जमा भदौ १६ गते उजुरी दिएका छन् ।

भाइभाइ बीचमा अंशसम्बन्धी छलफल हुँदा विवाद भएपछि इलाका प्रहरी कार्यालय चौरजहारीका प्रहरीले महेशलाई भदौ ६ गते गिरफ्तार गरी कुटपिट गरेको भन्दै उक्त घटनामा संलग्न प्रहरीलाई कानुनी कारबाहीको माग गर्दै आयोगमा उजुरी दिएको पीडितका बावुले बताएका छन् । पीडित पक्षले आयोगमा इमेलमार्फ उजुरी दर्ता गरेको पीडितका बावु शरणले बताए ।

प्रहरीले गिरफ्तार गरेपछि लट्ठीले पिट्दै, शरीरका कपडा खोलेर हिँडन लगाएको पीडितका बुवाले आरोप लगाएका छन् । जिल्लामा सबैसँग न्यायका लागि अनुरोध गरे, कसैले सहयोग नगरेपछि इलाका प्रहरी कार्यालय चौरजहारीका इञ्चार्ज इन्स्पेक्टर पुष्पकमल श्रेष्ठ र जिल्ला प्रहरी कार्यालयका डीएसपी रुपेश खड्कालाई कारबाहीको माग गर्दै आयोगमा उजुरी दर्ता गरेको उनले बताए ।

महेश जिल्ला प्रहरी कार्यालय रुकुमको हिरासतमा छन् । प्रहरीका अनुसार महेशले सार्वजनिक ठाउँमा आफन्तलाई कुटेकाले सार्वजनिक अपराध अन्तर्गत मुद्दा चलाइएको छ । यस विषयमा जिल्ला प्रहरी कार्यालयका प्रमुख डीएसपी रुपेश खड्कासँग सम्पर्क हुन सकेन । केही समय यता जिल्ला प्रहरी कार्यालय रुकुमले आरोपितलाई हिरासतमा कुटपिट गर्ने तथा यातना दिने गरेको आरोपहरू बढेका छन् ।

आदर्श केसी