समाचारहरू

अदानचुली गाउँपालिका–६ स्थित पाम्सकी २३ वर्षीया सर्मिला बुढाले दिएको बहुविवाहको उजुरी प्रहरीले दर्ता गर्न नमानेको पीडितले गुनासो गर्नु भएको छ । २३ वर्षीय पती धर्मजित बुढाले ०७९ चैत ३ गते अर्को विवाह गरेको भन्दै गत चैत २७ गतेदेखि बैशाख ३ गतेसम्म नियमित उजुरी लिएर जिल्ला प्रहरी कार्यालय हुम्लामा गए पनि उजुरी दर्ता गर्न नमानेको पीडित बुढाले आरोप लगाउनु भएको छ ।

उजुरी दर्ताका लागि प्रहरीलाई अनुरोध गर्दा पनि विभिन्न बाहाना बनाएर दैनिक दिन फर्काउने गरेको इन्सेक प्रतिनिधिलाई बताउनु भएको हो । बहुविवाहका आरोपित हाल काठमाण्डौँमा बस्दै आएको र उनलाई नियन्त्रणमा लिनका लागि उजुरी गरेको भए पनि प्रहरीले सुनुवाई नगरेको पीडित पक्षले आरोप लगाएको छ ।

सो विषयमा प्रहरीलाई बुझ्दा स्थानीय तहका जनप्रतिनिधिले बहुविवाह गरेको भनेर प्रहरी मुचुल्कामा तथ्यपुरक पत्र आएपछि मात्रै मुद्दा दर्ता हुन्छ मुद्दा फाटका प्रहरी हवल्दार यमबहादुर वलीले बताउनु भएको छ तर अदानचुली गाउँपालिका–६ का वडाअध्यक्ष विर्षबहादुर बुढा लगायतका गाउँका जानमानले प्रहरीले बुझेको पत्रमा विवाह गरेको हैन भनेपछि प्रहरीले उजुरी मुद्दा दर्ता गर्न नमानेको पीडित महिलाले आरोप लगाउनु भएको छ ।

सो विषयमा इन्सेक जिल्ला प्रतिनिधीले वडाध्यक्ष बुढालाई बुझ्दा आफुले सो कुरा नभनेर आरोपितले विवाह गरेकै हो तर घरमा ल्याएको छैन भनेको जानकारी दिनु भएको छ । प्रहरीमा उजुरी मुद्दा दर्ता नभएपछि महिला झन थप पीडामा परेको महसुस गर्दै घर फर्कनु परेको पीडितका बुवा धनराज बुढाले बताउनु भएको छ ।

नन्द सिंह