प्रहरीले कुटपिट गरेको पीडित पक्षको आरोप

  ०७७ वैशाख २४ गते

याङवरक गाउँपालिका–३ स्थायी घर भई फिदिम नगरपालिका – १ मा बस्दै आउनु भएका २२ वर्षीय पारस योङ्याले प्रहरीले वैशाख २३ गते कुटपिट गरेको गरेको आरोप लगाउनु भएको छ ।

फिदिम बजारस्थित प्रहरी कार्यालय नजिकै सई मनिचन्द्र चौधरीले वैशाख २३ गते कुटपिट गरेको आरोप पीडित पक्षको छ ।

कुटपिटबाट निलडाम र कानमा चोट लागेको पीडितले बताउनुभयो । कुटपिट गर्ने प्रहरी विरूद्व उजुरी दिने तयारी गरिएको ट्रयाक्टर धनी धनप्रकाश खवासले जानकारी दिनुभयो । पीडित पेशाले ट्रयाक्टर चालक हो ।

जिल्ला प्रहरी कार्यालयका इन्स्पेक्टर रोमनराज अर्यालले भने प्रहरीले कुटपिट नगरेको र राति हिँडिरहेकाहरूलाई सम्झाई–बुझाई गर्ने क्रममा सामान्य घटना भएको बताउनुभयो ।

घटनाका प्रत्यक्षदर्शी पत्रकार कविन्द्र शेर्मालाई आरोपित प्रहरी हवल्दार चौधरीले गाली गलौज गर्नुका साथै मार्ने धम्की दिएको पीडित शेर्माले बताउनुभयो । “बजारमा होलल्ला भएपछि बाहिर निस्किएको थिएँ”– उहाँले भन्नुभयो “मलाई नै पत्रकार कुट्छु भन्दै गाली लगौज गरें । घटनाको विषयमा इन्सेक जिल्ला प्रतिनिधिसहितका पत्रकारहरूसँग वैशाख २४ गते जिल्ला प्रहरी कार्यालयका भएको छलफलमा डिएसपी सिद्धराज न्यौपाले घटनाको अनुसन्धान गरी दोषी देखिएमा कारबाही गर्ने प्रतिवद्धता जनाउनु भयो । “घटना व्यक्तिगत नभई सिङ्गो पत्रकारिता क्षेत्रसँग जोडिएकाले म कार्यालय प्रमुखको हैसियतले माफी माग्छु” – उहाँले भन्नु भयो– “म मातहतका जो कोही कर्मचारीबाट यस्ता घटना भएको भए अनुसन्धान गरी विभागीय कारबाही गर्नेछु ।”

कोरोना सङ्क्रमणको रोकथामका लागि सरकारले जारी गरेको लकडाउनको अनुगमन गर्न निस्कने प्रहरीको गस्तीले सर्वसाधारणलाई कुटपिट गर्ने गरेको समुदायले गुनासो गर्ने गरेका छन् ।


मङ्गल वेघा