समाचारहरू

छाँयानाथ रारा नपा-७ की २३ वर्षीया पुनीता शाहीलाई जेठ २१ गते रारा विमानस्थल सुरक्षार्थ खटिएका प्रहरी यामलाल अधिकारी र सुनिता नगरकोटीले कुटपिट गरेको घटना सम्बन्धमा पीडितले सोही दिन साँझ जिल्ला प्रहरी कार्यालयमा दिएको उजुरी प्रहरीले दर्ता नगरेको पीडित पक्षले आरोप लगाएको छ ।

दुबै प्रहरीले आफूलाई कपाल लुछ्दै दाउराले कुटपिट गरेपछि न्यायका लागि जेठ २१ गते जिल्ला प्रहरी कार्यालय पुगेको पीडितले बताइन् । प्रहरीको कुटपिटबाट टाउको, ढाड र छातीमा चोट लागेकी पीडित महिलाको जिल्ला अस्पतालमा उपचार भइरहेको छ ।

छिमेकी विद्या मल्लसँग जेठ २० गते घरायसी झगडा भएकोमा आफन्त र अन्य गाँउलेको आग्रहमा जेठ २१ गते पुनीता र विद्याले प्रहरी चौकी पिनामा मिलापत्र गरेका थिए ।

मिलापत्र भएको घटनाका विषयमा यामलाल र सुनिताले पीडितको घर आँगनमा कुटपिट गरेको पीडितका आफन्त कर्ण जङ् शाहीले आरोप लगाए ।

घटना सम्बन्धमा जिल्ला प्रहरी कार्यालयमा मौखिक जानकारी आएको जिल्ला प्रहरी कार्यालयका डिएसपी शारदाप्रसाद चौधरीले बताए ।

घटनामा संलग्न भनिएका दुवै जना प्रहरी र पीडित पक्षलाई बोलाई सोधपुछ गरी छलफल गर्ने र बिनाकारण प्रहरीले कुटपिट गरेको भए आवश्यक कारबाही गर्ने डिएसपी चौधरीले आश्वासन दिए ।

जीवन सेजुवाल