समाचारहरू

जिल्ला प्रहरी कार्यालय हुम्लामा कार्यरत ३५ वर्षीय असई पूर्ण बहादुर विक र ३४ वर्षीय प्रहरी हवल्दार सुरेन्द्र विष्टलाई हातपात गरेको आरोपमा सिमकोट गाउँपालिका–२ का २३ वर्षीय पृथ्वी रोकाया र सोही गाउँपालिका–६ का २२ वर्षीय आशिष रावत विरुद्ध प्रहरीले असार १० गते उजुरी दर्ता गरेको छ ।

असार ८ गते साँझ सदरमुकाम सिमकोटको एयरपोट चोकमा आरोपित दुई जना युवकले गाडी तोडफोड गर्ने क्रममा प्रहरीले नियन्त्रणमा लिएर सम्झाई बुझाई गर्दा आफूलाई हातपात गरेको असई पूर्णबहादुर विकले आरोप लगाउनु भएको छ ।

सदरमुकाम सिमकोटको बजारमा गस्तीमा गएको प्रहरीलाई हातपात गरेको भन्दै मदिराले लठ्ठिएका स्थानीय दुबै जना युवकलाई असार ९ गते गिरफ्तार गरेको इन्सपेक्टर राजन प्रसाद भट्टराईले बताउनु भएको छ ।

असार १० गते जिल्ला प्रशासन कार्यालय हुम्लामा अभद्र व्यवहारमा मुद्दा दर्ता भएसँगै पाँच दिनको म्याद थप गरी अनुसन्धान भइरहेको इन्स्पेक्टर भट्टराईले बताउनु भएको छ । दुबै प्रहरीको जिल्ला अस्पताल हुम्लामा उपचार भएको सिनियर अनमी सरिता बोहराले बताउनु भएको छ । प्रहरी दुबैको शरीरमा सामान्य चोट लागेको छ ।

नन्द सिंह