समाचारहरू

महोतरी जिल्लाको जलेश्वर नगरपालिका–९ घर भई हाल जिल्ला प्रहरी कार्यालय सिरहामा कार्यरत २६ वर्षीय प्रहरी जवान अनु रायलाई यातना दिएको घटनाको अनुगमन इन्सेक मधेस प्रदेशले ०८० असार २९ गते गरेको छ ।

इन्सेक मधेश प्रदेश कार्यालयका संयोजक राजु पासवान, जिल्ला प्रतिनिधि दुर्गा परियार, फोकल पर्सन बरुण बस्याल र ओरेककी संयोजक अनिता चौधरीले जिल्ला प्रहरी कार्यालय सिरहामा पीडित लगायत एसपी, डिएसपी लगायतहरू सँग भेटघाट गरेको हो ।

अनुगमनको क्रममा पीडित अनु रायले असार २४ गते मिर्चैयामा भएको आन्दोलनको लागि खटिएर राती ३ बजे फर्किएको र आराम गरी ड्यूटी गरेर पुन २५ गते राती १० बजेको लागि पनि हब्लदार मेजरले डयूटीमा खटाएकोले हबल्दारसँग गुनासो गर्दा हबल्दारले इन्सपेक्टर हेमन्त राईसँग कुरा गर्न भन्नु भयो । इन्सपेक्टरसँग कुरा गर्दा अपशब्द बोली गालि गरे पछि आफूले किन गाली गरेको भनी सोध्दा कुट्न थाले पछि आफू कार्यालय बाहिर भागेको र इन्सपेक्टरको आदेशमा केही प्रहरीहरूले मलाई समाती हतकडी लगाई इन्सपेक्टर नजिक ल्याएर पुन मलाई थप्पड हानी बुटले कुटपिट गरी मेडीकल गर्न लगेको र मेडीकलमा रक्सी खाएको प्रमाणित नभए पछि दुई पटक सम्म मेडीकल गर्न लगाएको रायले बताए । २५ गते रातीदेखि २६ गते दिनभरि सम्म थुनामा राखेको र २७ गते डिआईजिले निरिक्षणको क्रममा छाडीदिन निर्दैशन दिए पनि २७ गते १२ बजे देखि ६ बजे सम्म थुनामा राखेको पीडित प्रहरी जवान रायले बताए ।

त्यसैगरी आरोपित इन्सपेक्टर ३४ वर्षीय हेमन्त राईले आफू बेलुका ड्यूटीमा जान कार्यालयमा आएको र होहल्ला सुने पछि बाहिर आई हेर्दा अनु रायले होहल्ला गरी रहेको, मर्ने मार्ने भन्दै सेन्ट्रीको बन्दुक खोस्ने प्रयास गरेको र बाहिर मर्छु भन्दै हिडे पछि प्रहरहिरूलाई नियन्त्रणमा लिन पठाएर मेडीकल गर्न पठाएको बताए । बढी होहल्ला गर्दा एक बुट हिर्काएको तर यातना नदिएको राईले बताए ।
जिल्ला प्रहरी कार्यालय सिरहाका डिएसपी रविन्द्रराज पाण्डेले इन्सपेक्टरले घटनाको जानकारी गराए पछि मेडीकल गरी नियन्त्रणमा राख्न आदेश दिएको बताउनु भयो । प्रदेश कार्यालयबाट डिएसपीको कमाण्डमा छानवीन टोली आएको र छानवीनको क्रममा आएको प्रतिबेदनको आधारमा दोषीलाई कारबाही हुने बताउनु भयो ।

प्रदेश प्रहरी कार्यालयका डिआजी जनक भट्टराई जिल्ला प्रहरी कार्यालयको निरिक्षणमा असार २७ गते आउनु भएको थियो । घटनाको जानकारी हुनासाथ तत्कालै डिएसपी ज्ञानकुमार महतोको नेतृत्वमा छानवीन समिति बनाएर घटनाको छानवीन गर्न आउनु भएका डिएसपी महतोले हाम्रो टोलीले निश्पक्ष तरिकाले प्रबिधिको प्रयोग गरेर छानवीन गरेको र छानवीनको प्रतिबेदन पेश गर्ने बताउनु भयो ।
जिल्ला प्रहरी कार्यालय सिरहाका एसपी टेकु नन्दन इवा लिम्बुले नेपाल प्रहरीमा धेरै सुधार भएको र अहिले प्रहरीले कसैलाई पनि कुटपिट नगर्ने गरेको बताउनु भयो । प्रहरीले अरुलाई त कुट्दैन झन् आफ्नै प्रहरीलाई यातना नदिएको बताउनु भयो । छानवीन समितिले दिएको प्रतिबेदनको आधारमा दोषी जो कोही भए पनि कारबाही प्रकृया अगाडि बढाउने बताउनु भयो ।

दुर्गा परियार