समाचारहरू

ड्युटीमा रहेको अवस्थामा प्रहरीमाथि हातपात गरेको आरोपमा प्रहरीले ६ जना युवालाई भदौ ७ गते गिरफ्तार गरेको छ ।

सोलुदूधकुण्ड नगरपालिका–११ मा प्रहरीमाथि हातपात गरेको आरोपमा प्रहरीले ओखलढुङ्गा सिद्धिचरण नगरपालिका–६ का २५ वर्षीय विजय मगर,सोलुदूधकुण्ड नगरपालिका–८ का २४ वर्षीय शेरबहादुर मगर,सोही ठाँउका ४५ वर्षीय भीमबहादुर मगर,सोलुदूधकुण्ड नगरपालिका–११ का ४० वर्षीय चन्द्रबहादुर मगर,सोही ठाँउका ३८ वर्षीय मोहन कार्की र ३५ वर्षीय फूर्वा शेपालाई अनुसन्धानका लागि गिरफ्तार गरेको जिल्ला प्रहरी कार्यालयका डिएसपी टेकुनन्द ईवा लिम्बूले इन्सेक प्रतिनिधिसँगको फोन सम्पर्कमा बताउनु भयो ।

सोलुदूधकुण्ड नगरपालिका–११ मा रहेको अस्थायी प्रहरी चौकीका ४२ वर्षीय असई सरयुग महतो,प्रहरी हवल्दार ३६ वर्षीय नवराज खड्का र २७ वर्षीय जवान नवराज कार्कीमाथि भदौ ७ गते हातपात भएको जिल्ला प्रहरी कार्यालयका इन्स्पेक्टर मन्दीप चौहानले बताउनु भयो । इन्स्पेक्टर चौहानका अनुसार आरोपितहरू मदिरा सेवन गरी होहल्ला गर्दै बसेको र प्रहरीले सम्झाउने क्रममा प्रहरीमाथि हातपात भएको हो ।

हातपातबाट सामान्य चोट लागेकाहरूको जिल्ला अस्पतालमा उपचार भएको छ । घटनाका विषयमा अनुसन्धान थालिएको प्रहरीले जनाएको छ ।

भोजराज कार्की