समाचारहरू

खार्पुनाथ गाउँपालिका–५, याङचुका स्थानीय ३३ वर्षीय धनबहादुर परियारलाई मुगु जिल्ला घर भइ खार्पुनाथ गाउँपालिका–५ स्थित याङचु प्रहरी चौकीमा कार्यरत सई ४५ वर्षीय लोकजन बुढाले धम्की दिएको पीडित पक्षले आरोप लगाएका छन् ।

गाउँपालिका कार्यालय नजिकै रहेको स्थानमा तरकारी व्यवसायी गर्दै आएका कृषक परियारलाई भदौ १९ गते पटक पटक धम्की दिने गरेको पीडित पक्षले आरोप लगाएका छन् । पीडित परियारले आफ्नो तरकारी बारी र प्रहरी चौकीसँगै रहेकोले उक्त बारीमा जाँदा आउँदा अपशब्द बोल्नुका साथै सई बुढाले बाटो बन्द गर्ने, ड्रममा तरकारीका लागि बनाएको मललाई खनाएर खेर फालिदिने, मदिरा सेवन गरी दलित भनेर आफू र आफ्नी पत्नीलाई धम्क्याउने गरेको बताउनु भयो ।

पटक पटक धम्कीपूर्ण भाषा बोलेको भन्दै पीडितले भदौ १९ गते जिल्ला प्रहरी कार्यालयमा मौखिक उजुरी गरेको जिल्ला प्रहरी कार्यालयका इन्स्पेक्टर नरेन्द्रबहादुर चन्दले बताउनु भयो । पीडित पक्षले दिएको उजुरीको आधारमा तत्काल सो प्रहरी चौकीमा रहेका सईको ठाउँमा अर्को इन्चार्ज पठाउने र आरोपित विरुद्ध थप अनुसन्धान गरिने इन्स्पेक्टर चन्दको भनाइ छ ।

नन्द सिंह