समाचारहरू

शुभकालिका गाउँपालिका–८ की ३५ वर्षीया मनिषा कामीलाई माघ २ गते जिल्ला प्रहरी कार्यालयका इन्सपेक्टर भुपेन्द्र शाहीले कुटपिट गरि घाइते बनाएको आरोप लागेको छ ।

छोरीलाई शाब्दिक दुर्व्यवहार भएको विषयमा निवेदन दिन जिल्ला प्रहरी कार्यालय गएको समयमा आफूमाथि इन्स्पेक्टर शाहीले कुटपिट गरेको पीडित कामीले इन्सेक प्रतिनिधिलाई जानकारी दिनुभयो ।

प्रहरीको कुटाइबाट पीडितको घाटी र कानमा चोट लागेकाले जिल्ला अस्पताल कालिकोटमा उपचार भइरहेको स्वास्थ्य कार्यालय कालिकोटका निमित्त प्रमुख रत्नविर सुनारले बताउनुभयो ।

प्रहरी इन्सपेक्टर शाहीले आफूले कुटपिट नगरेको बरू झडप हुन लाग्दा नियन्त्रण गर्ने क्रममा चोट लागेको हुनसक्ने बताउनुभयो ।

छोरीलाई दुर्व्यवहार गर्ने रेडियो नयाँ कर्णाली कालिकोटमा कार्यरत चामुण्डा विन्दासैनि नपा–४ का २३ वर्षीय ललित विष्ट बिरूद्ध उजुरी दिन लाग्दा इन्स्पेक्टरले छोरीको पक्ष लिएको भन्दै आफूलाई कुटपिट गरेको पीडितको आरोप छ ।

घटनाका विषयमा जिल्ला प्रहरी कार्यालयका प्रमुख डिएसपी सिद्धराज न्यौपानेले आफू जिल्ला बाहिर रहेकोले जिल्ला फर्केपछि दोषि उपर कारवाही गरिने बताउनुभयो ।

घटनाका विषयमा सुनुवाई नभएको भन्दै पीडित पक्षले कुनैपनि निकायमा उजुरी दिएका छैनन ।

कालीबहादुर मल्ल