समाचारहरू

राष्ट्रपति विद्यादेवी भण्डारीको सवारीको समयमा सडकमा निस्किन खोजेको आरोपमा ०७९ माघ २७ गते प्रहरीले राष्ट्रिय ट्रमा सेन्टरका वरिष्ठ अर्थोपेडिक सर्जन डा. जनिथलाल सिंहमाथि कुटपिट गरेको छ । प्रहरीको कुटपिटबाट डा. सिंहको कन्चटमा चोट लागेको छ ।

प्रहरीको कुटपिटबाट घाइते डा. सिंहका अनुसार ०७९ माघ २७ गते अस्पतलमा अप्रेशन सकाएर घर फर्कने क्रममा वीर अस्पतालअघिको आकाशे पुल नजिक फुटपाथमा साइकल रोकेर राखेका बखत प्रहरी हवल्दार शम्भूजंग गुरुङले साइकल पार्किङमा लगेर जान भनेको र आफूले पार्किङ अस्पतालको दुई तला मुनि छ, त्यहि बस्छु भन्दा ती प्रहरीले एक्कासी मुक्का हानेको बताउनुभयो ।

प्रहरीको कुटपिटबाट घाइते डा. सिंहको वीर अस्पतालको अब्जरभेसन वार्डमा राखेर उपचार भईरहेको वीर अस्पतालका डा. जनकराज पोखरेलले जानकारी दिनुभयो ।

आफ्ना सहकर्मीमाथि कुटपिट भएपछि ट्रमा सेन्टर र वीर अस्पतालमा कार्यरत डाक्टरले डा. जनिथलाल सिंहमाथि कुटपिट गर्ने प्रहरीमाथि कारवाही गर्नुपर्ने भन्दै वीर अस्पताल अगाडि केहीबेर आन्दोलन गरेका थिए ।

यसैबीच घटनामा संलग्न भएका महानगरीय प्रहरी वृत्त जनसेवाका वरिष्ठ प्रहरी हवल्दार शम्भूजंग गुरुङलाई जिल्ला प्रहरी परिसर काठमाडौँले निलम्बन गरेको जिल्ला प्रहरी परिसर काठमाडौँका एसएसपी दानबहादुर कार्कीले जानकारी दिनुभयो ।

विमल पौडेल