समाचारहरू

स्थानीय तह निर्वाचन अन्तरगत नारायण नगरपालिकाका जनप्रतिनिधिको मतगणना भइरहेको अवस्थामा जिल्ला सदरमुकामस्थित मुख्य निर्वाचन अधिकृतको कार्यालय अदालत बाहिर युवाहरूबीच विवादले उग्ररुप लिएपछि जेठ २ गते राति प्रहरीको लाठी चार्जबाट सर्वसाधारण र पत्रकार घाइते भएका छन् ।

जिल्ला अदालतमा रहेको मुख्य निर्वाचन अधिकृतको कार्यालय अगाडि युवाहरूको दुई समूहबीच भएको आपसी विवाद साम्य पार्न प्रहरीले सर्वसाधारण र पत्रकारमाथि लाठी चार्ज गर्ने क्रममा केही व्यक्ति घाइते भएको जिल्ला प्रहरी कार्यालय, दैलेखका डीएसपी भुवनेश्वर साहले जानकारी दिनु भएको छ ।

युवाहरूले प्रहरीमाथि ढुङ्गा प्रहार गरेपछि नेपाल प्रहरी र सशस्त्र प्रहरीले मत परिणामको पखाईमा रहेको सर्वसाधारण र मुख्य निर्वाचन कार्यालयमा मत परिणामको समाचार सङ्कलनका लागि गएका पत्रकारमाथि लाठी चार्ज गरेका हुन ।

लाठी चार्जबाट दुई पत्रकारसहित नारायण नगरपालिका–७ की डिलमाया शाहीलगायत सर्वसाधरण घाइते भएका छन् । लाठी चार्जबाट नेपाल पत्रकार महासङ्घ दैलेखका उपाध्यक्ष महेन्द्र सापकोटा र रेडियो नेपालमा कार्यरत भीमबहादुर सिजापती घाइते छन् । घाइतेहरुको स्थानीय मेडिकलमा उपचार भइरहेको छ ।

यता युवाहरूको ढुङ्गा प्रहारबाट नेपाल प्रहरी र सशस्त्र प्रहरी पनि घाइते भएको प्रहरीको भनाई छ । घाइतेहरूको जेठ २ गते राति नै स्थानीय मेडिकलमा उपचार गरी घर फर्किएका प्रहरीले बताएको छ । घटनाको सन्दर्भमा नेपाल पत्रकार महासङ्घ, दैलेख शाखाका अध्यक्ष यज्ञराज थापाले जेठ ३ गते विज्ञप्ती जारी गर्दै दोषीलाई कारवाहीको माग गर्नु भएको छ ।

मतगणनाको नतिजा सुन्न सडकमा उभिएका सर्वसाधारण र समाचार सङ्कलन गर्न गएका पत्रकार माथि लाठी चार्ज भएकोले यो क्षम्य हुन नसक्ने मानव अधिकार रक्षक सञ्जालका जिल्ला संयोजक बिशाल सुनारको टिप्पणी छ ।

अमर सुनार