प्रहरीको गोली लागि तीन जनाको मृत्यु

सप्तरीको राजविराजमा प्रहरीले चलाएको गोली लागेर मृत्यु हुनेको संख्या तीन पुगेको बताइएको छ। यद्यपी प्रहरीले भने सप्तरी मलेठ-२ का सञ्जन मेहताको मात्रै मृत्यु भएको पुष्टि गरेको छ । सप्तरी मलेठ-४ का पिताम्बर मण्डल र आनन्द शाहको मृत्यु भएको राससले जनाएको छ ।

झडपका क्रममा प्रहरीको गोली लागी गम्भीर घाइते भएका सप्तरी मलेठ-४ का पिताम्बर मण्डल र आनन्द शाहको उपचारका क्रममा धरानमा मृत्यु भएको जनाइएको हो । त्यस्तै प्रहरीको गोली लागेर सञ्जन मेहताको घटनास्थलमै मृत्यु भएको थियो।

सोमबार राजविराजको औद्योगिक क्षेत्रमा नेकपा एमालेको मेची महाकाली अभियानको कार्यक्रम सकिएपछि सभास्थल बाहिर मधेसी मोर्चाका कार्यकर्ताले ढुङ्गामुढा गर्न थालेपछि प्रहरीले सुरुमा हवाई फायर गरेको थियो। प्रहरीले हवाई फायर गर्दा पनि प्रदर्शनकारीले ढुङ्गामुढा गर्न नछोडेपछि गोली चलाउन बाध्य भएको प्रहरीको भनाइ छ ।

नेकपा (एमाले)को मेची–महाकाली जागरण अभियान अन्तर्गत सप्तरीको राजविराजस्थित औद्योगिक क्षेत्रमा आयोजना गरिएको जनसभा बिथोल्न पुगेका मधेसी मोर्चाका कार्यकर्तामाथि प्रहरीले गोली प्रहार गर्दा तीन जनाको मृत्यु भएको हो ।

राष्ट्रिय मधेस समाजवादी पार्टीका केन्द्रीय सचिव गजेन्द्र मण्डलका अनुसार प्रहरीको गोली लागेर घाइते भएका अन्य सात जनाको धरानस्थित बिपी कोइराला स्वास्थ्य विज्ञान प्रतिष्ठानमा उपचार भइरहेको राससले जनाएको छ । घाइतेमध्ये तीन जनाको पेटमा गोली लागेको बताइएको छ । प्रहरीको गोली लागेर दीगम्बर यादव, दिलीप यादव, सुरेन्द्र मण्डल, प्रमोद मण्डल, जितेन्द्र साह, इन्द्र नारायण साह र वीरेन्द्र महतो गम्भीर घाइते भएका छन् ।

मोर्चाका कार्यकर्तालाई नियन्त्रणमा लिन र सभास्थलको सुरक्षाका लागि प्रहरीले गोली चलाउनु परेको सप्तरीका प्रमुख जिल्ला अधिकारी उद्धव तिमल्सिनाले बताए ।

यसैबीच, संयुक्त लोकतान्त्रिक मधेसी मोर्चाका कार्यकर्ताहरुले सप्तरी घटनाको विरोधमा फागुन २३ गते साँझ सिरहाको गोलबजारमा विआर ५१ ए ४०१३ नं को भारतीय ट्रकमा आगजनी गर्नुका साथै दर्जनभन्दा बढी सवारी साधनहरुमा तोडफोड गरेको प्रहरीले जनाएको छ ।

सो क्रममा आधा दर्जन भन्दा बढी यात्रुसमेत घाइते भएको र घाइतेको स्थानीय अस्पतालमा उपचार भइरहेको इलाका प्रहरी कार्यालय गोलबजारले जनाएको छ ।


मनोहरकुमार पोखरेल