समाचारहरू

बागमती नगरपालिका–२ निवासी नेत्रविक्रम चन्द ‘विप्लव’ नेतृत्वको नेकपा सर्लाही जिल्ला इन्चार्ज ४७ वर्षीय कुमार पौडेलको असार ५ गते दिउँसो प्रहरी कारवाहीमा मृत्यु भएको प्रहरीले जनाएको छ । जिल्ला प्रहरी कार्यालय सर्लाहीले असार ५ गते विज्ञप्ति जारी गरी यस घटनाको पुष्टि गरेको हो ।

लालबन्दी नगरपालिका–१ लखनदेवी जङ्गलमा दुई ओटा मोटरसाइकलमा लालबन्दीबाट उत्तरतर्फ गइरहेका चार जना व्यक्तिले गस्तीमा रहेको प्रहरीमाथि फयरिङ गरेपछि प्रहरीले आत्मरक्षाका लागि जबाफी फायर गर्दा पौडलेको मृत्यु भएको र अन्य तीन जना फरार भएको प्रहरीले जनाएको छ ।

फरार तीन जनाको खोजी कार्य तीव्र पारिएको प्रहरीले जनाएको छ । मृतकको शवलाई पोष्टमार्टमको लागि जिल्ला अस्पताल मलङ्गवामा पठाइएको प्रहरीले जनाएको छ ।

घटनास्थलबाट विष्फोटनको लागि प्रयोग हुने डेडकर्ड तीन फिट, फ्युज वायर पाँच फिट, मेड इन युएसए लेखिएको रिभल्वर एक थान, सोमा लाग्ने चार राउण्ड गोली, मृतकको झोलाबाट एक थान कटुवा पेस्तोल, सोमा लाग्ने दुई राउण्ड गोली, अखिल नेपाल भूमिहीन सुकुम्बासी सङ्घ लेखिएको कसैको नाम उल्लेख नगरिएको परिचय पत्र २ सय थान, ना २२ प ६४ नम्बरको पल्सर मोटरसाइकल एक थान र अनटेस्त एफजे मोटसाइकल एक थान बरामद गरिएको विज्ञप्तिमा उल्लेख छ ।

बुधन साह