समाचारहरू

जिल्ला प्रशासन कार्यालय पर्सामा स्तनपान कक्ष नहुँदा सेवाग्राही सुत्केरी महिलाहरू समस्यामा पर्ने गरेका छन् ।

जिल्ला प्रशासन कार्यालयमा करिब सात करोडको लागतमा सुविधा सम्पन्न नयाँ भवन बनाइएको भएपनि त्यसमा स्तनपान कक्षको भने व्यवस्था गरिएको छैन । नागरिकता, पासपोर्ट, नाता प्रमाणीत लगाएतका सेवा लिन आउँदा बालबालिका लिएर आउने महिलाले छोरा–छोरीलाई स्तनपान गराउन असहज हुने गरेको उहाँहरूको भनाई छ ।

नागरिकता बनाउन आएकी पोखरिया नगरपालिका–५ की २२ वर्षीय रिमा पटेलले स्तपान कक्षको अधावमा निकै समस्या खेप्नु परेको बताइन् । सेवा लिन आउदा एक त काम छिटो छरितो हुँदैन त्यसमा पनि गर्मीमा पति पत्नी नै दुईदिन देखी धाइरहेका छौं त्यसमाथि दुधेबालकलाई बेला बेलामा स्तनपान गराउनु पर्छ बसेर स्तनपान गराउने ठाउ समेत नभएको भन्दै दिग्दारी पोख्छिन् ।

वीरगंज महानगरपालिकाको–११ रानीघाटकी २३ वर्षीय ललिता देवीको पनि पीडा उस्तै छ । उनीहरू पति पत्नी नागरिकताको लाइनमा छन् । दुधे बालकलाई लिएर ससुरा प्रशासन कार्यालय अगाडिको सानो छाहारीमा बसेका छन् । काम नहुँदाको आक्रोश त छदैछ । गर्मीका कारण आएको पसनिाले गर्दा बच्चाले राम्रोसंग दुध खान नपाएको उनको गुनासो छ ।

पटेर्वा सुगौली गाउँपालिका–ं१ क्ञ्चनपुर की २४ वर्षीय फतमा खातुनको पनि समस्या त्यही नै छ । उनले बच्चालाई स्तनपान गराउनका लागि सामान्य ठाउ समेत नभएको भन्दै गुनसो गरिन् ।

सार्वजनिक तथा निजी सङ्घसंस्थामा स्तनपान कक्षको व्यवस्था गर्नुपर्ने ऐनमा उल्लेख छ । तर पर्सा जिल्लाका अधिकांश सरकारी तथा गैरसरकारी संस्थामा यसको व्यवस्था छैन । नयाँ बन्दै गरेका पूर्वाधारहरूमा समेत स्तनपान कक्षको व्यवस्था नगरिएको प्रति महिलाअधिकारकर्मी लक्ष्मी उप्रेतीको गुनासो छ ।

कार्यालयमा कार्यरत महिला कर्मचारी तथा सेवा लिन आउने सेवाग्राहीका बच्चालाई स्तनपान गराउन सहज होस् भनेर कार्यालयमै स्तनपान कक्षको स्थापना गर्नुपर्ने व्यवस्था भए पनि जिल्लाका अधिकांश कार्यालयमा यसको अभ्यास भएको पाइँदैन ।

स्तनपान नवजात शिशुको अधिकार र आमाको कर्तव्य भए पनि व्यवस्थित कक्ष सञ्चालन नहुँदा महिलाहरूले खुल्ला स्थानमा असहजरूपमा स्तनपान गराउनु पर्ने बाध्यता छ ।

जिल्लाका सबै सार्वजनिक कार्यालयहरूमा स्तनपान कक्ष निर्माण र सञ्चालन गर्न माग गरेको महिला अधिकारकर्मी उप्रेतीले बताउनु भयो ।

कृष्णचन्द्र लामिछाने