समाचारहरू

राम नवमीको अवसरमा हिन्दू धार्मिक संस्थाले विराटनगर महानगरपालिका-१५ मा वैशाख ५ गते निकालेको र्‍यालीका क्रममा मुस्लिम समुदायका युवासँग झडप भएको घटनालाई मध्यनजर गर्दै जिल्ला प्रशासन कार्यालयले जिल्लामा सभा-सम्मेलनमा रोक लगाएको छ ।

प्रशासन कार्यालयले ०८१ वैशाख ६ गते विहान १० बजेदेखि अर्को सूचना जारी नहुञ्जेलसम्म जिल्लामा विना अनुमति सभासम्मेलनमा रोक लगाएको हो ।

प्रशासनले आवश्यक समन्वय नगरी राजनैतिक सभा, सम्मेलन, सामाजिक भेला, धार्मिक गतिविधिलगायत सबै प्रकारको र्‍याली, भेला, प्रदर्शनलगायतका कार्यक्रम गर्न रोक लगाएको छ ।

जिल्ला सुरक्षा समितिको वैशाख ६ गतेको बैठकले जिल्लाको शान्ति सुरक्षाको सम्वेदनशीलतालाई मध्यनजर गरी सभासम्मेलन गर्न अर्को आदेश नभएसम्मका लागि रोक लगाइएको मोरङका सहायक प्रमुख जिल्ला अधिकारी प्रदीप साहले बताउनु भयो । उहाँले प्रशासनसँग अनुमति लिए, आवश्यक सुरक्षा प्रवन्धकसहित सभासम्मेलनका लागि अनुमति दिने बताउनु भएको छ ।

विराटनगर महानगरपालिका–१५ मलायारोडस्थित रामजानकी मन्दिरमा ०८१ वैशाख ६ गते आउँदै गरेको र्‍यालीलाई मस्जिदको बाटो भएर हिड्न अवरोध गरेपछि झडप भए पश्चात सुरक्षा समितिले जिल्लामा चमनचयनका लागि सभासम्मेलनमा रोक लगाउनु परेको सहायक प्रमुख जिल्ला अधिकारी साहको भनाइ छ ।

विनोद सुवेदी