प्रमुख प्रशासकीय अधिकृत शाहीलाई वडाध्यक्षले दुर्व्यवहार गरेको आरोप

  ०८१ वैशाख १२ गते

राजापुर नगरपालिका प्रमुख प्रशासकीय अधिकृत महेन्द्रजङ्ग शाहीलाई ०८१ वैशाख १० गते राजापुर नगरपालिका-२ का वडा अध्यक्ष रामचन्द्र चौधरीले दुर्व्यवहार गरेको आरोप लागेको छ ।

कार्यालय प्रमुखका कार्यकक्षमा वडा अध्यक्षले कार्ययल प्रमुखमाथि भएको घटनाको छानविन गरी दोषीलाई कडा कारवाही हुनुपर्ने कर्मचारीहरूले माग गरेका छन् । कर्मचारीहरूले वैशाख ११ गते विज्ञप्ति जारी गर्दै प्रमुख प्रशासकीय अधिकृतमाथि भएको दुर्व्यवहार घटनाको छानविन गरी कर्मचारीहरूलाई भयरहित तवरले सेवा प्रदान गर्न वातावरण सिर्जना हुनुपर्ने कर्मचारीहरूले राजापुर नगरपालिकासँग माग गरेका छन् ।

राजापुर नगरपालिका प्रमुख प्रशासकीय अधिकृत शाहीले आफूलाई दुर्व्यवहार गरेको भन्दै वडा अध्यक्ष चौधरी विरुद्ध वैशाख ११ गते जिल्ला प्रशासन कार्यालयमा मौखिक उजुरी दिनुभएको छ ।

राजापुर नगरपालिका-२ का वडा अध्यक्ष रामचन्द्र चौधरीले कर्मचारीहरूले जारी गरेको प्रेस विज्ञप्तिप्रति आप्पत्ति जनाउनु भएको छ । उहाँले प्रमुख प्रशासकीय अधिकृतमाथि दुर्व्यवहार गरिएको भन्ने विषय कपोकल्पित र बनावटी भएको बताउनु भयो ।

बुढीकुलो सरसफाई समितिले राजापुर नगरपालिकाको बजेटबाट बुढीकुलो मुहान ओखरिया इन्टेक सरसफाई योजना अनुसार नगरपालिका कार्यालयबाट कार्ययोजना स्वीकृत भई प्रमुख प्रशासकीय अधिकृतबाट कार्यदेश भएको थियो ।

सो योजनाको काम समय अगावै कार्यसम्पन्न भएर भुक्तानीको लागि पटकपटक कार्यालयमा सम्पर्क गर्दा कार्यालयले भुक्तानी दिन मानेको थिएन । उपभोक्ता समितिले आफूसँग भुक्तानी माग गरेकोले सो रकम निकासा गरिदिन आग्रह गर्न नगरपालिका गएको बताउनु भयो ।

वडा अध्यक्ष चौधरीले भन्नुभयो-‘कार्यालय प्रमुखको कार्यकक्षमा गई भुक्तानी प्रकृया छिटो छरितो बनाउन आग्रह गर्दा कार्यकारी प्रमुख शाहीले एक्कासी जगिएर सो योजना रोकिदिने चुनौती दिँदै दादागिरी हर्कत देखाए पश्चात सोको प्रतिवाद लागि वडा अध्यक्षको हैतियतले प्रतिवाद गरेको हो । यो सत्यलाई बङ्गाएर राजापुर नगरपालिकाका कर्मचारीहरूले विज्ञप्ति जारी गरेको हो ।’


प्रकाश पौडेल