प्रमुख निर्वाचन आयुक्त डा. यादवको पुतला दहन

राष्ट्रिय प्रजातन्त्र पार्टी नेपाल जुम्लाले वैशाख ५ गते प्रमुख निर्वाचन आयुक्त डा. अयोधिप्रसाद यादवको पुत्ला जलाएको छ । निर्वाचन आयोगले राप्रपाको विधानबाट हिन्दु राष्ट्र र संवैधानिक राजसंस्थाको व्यवस्था हटाउने निर्णय गर्नु अराजनैतिक र असंवैधानिक कार्य भएको आरोप लगाउँदै राप्रपा जुम्लाले प्रमुख निर्वाचन आयुक्त डा. यादवको पुत्ला जलाएको हो ।

निर्वाचन आयोगलाई आफ्नो निर्णय पुनर्विचार गर्न आग्रह गर्दै यदि निर्णय पुनर्विचार नभए पार्टी जस्तोसुकै कठोर निर्णयगर्न बाध्य हुने राप्रपा जुम्लाले बताएको छ ।

धर्ना तथा विरोध जुलुससहित बजार परिक्रमा गरी डा. यादवको पुत्ला जलाइसकेपछि जिल्ला प्रशासन कार्यालय अगाडि भएको कोणसभाको कार्यक्रमलाई सम्बोधन गर्दै राष्ट्रिय प्रजातन्त्र पार्टीका नेता रमानन्द न्यौपानेले निर्वाचन आयोगको एक पक्षीय निर्णय कुनैपनि हालतमा स्वीकार नहुने बताए ।

आयोगले कुनैपनि पार्टीको विचारलाई निषेध गर्न नहुने भन्दै त्यसले पार्टीको सिद्धान्त र विचार समाप्त नहुने उनको भनाइ छ । संविधान विपरित निर्णयगर्ने आयोगको पनि अधिकार नरहेको उनले दावी गरे ।


मानदत्त रावल