समाचारहरू

दिप्रुङ चुइचुम्मा गाउँपालिका–२ डाँडागाउँस्थित सारक्षरता आधारभूत विद्यालयमा कार्यरत शिक्षिका ४४ वर्षीया गोमा कार्कीले सोही विद्यालयकी ४६ वर्षीया प्रधानाध्यापक लक्ष्मी पौडेलले असार ३ गते कुटपिट गरेको आरोप लगाउनु भएको छ ।

विद्यालयको १ लाख ३२ हजार ९ सय ३१ रुपियाँको हिसाबकिताब खोजेको भन्दै प्रधानाध्यापक पौडेलले आफूलाई पानी पेटमा लात्ती हानेको पीडित शिक्षिकाको आरोप छ ।

असार ३ गते विद्यालय व्यवस्थापन समितिको बैठक बसेको बेला पाठ्यपुस्तकको १० हजार आठ सय ८५, सीपको १५ हजार, मसलन्दको १५ हजार, अडिटको १० हजार, मर्मतको नौ हजार, छात्रवृत्तिको चार हजार ८ सय, इन्टरनेटको १२ हजार, इन्टरनेट रिजार्चको १२ हजार, दिवा खाजाको ३४ हजार ५ सय ९६ रुपियासहित १ लाख ३२ हजार ९ सय ३१ रुपियाँको आयव्ययका बारेमा जिज्ञासा राख्दा आफूमाथि प्रधानाध्यापक पौडेलले कुटपिट गरेको पीडित शिक्षिकाको आरोप छ ।

पीडित शिक्षिका सोही विद्यालयकी पूर्व प्रधानाध्यपक विद्यालय व्यवस्थापन समिति अध्यक्ष सकुन्तला खत्रीले बताउनु भयो ।

असार ३ गते विद्यालय व्यवस्थापन समितिको बैठक चलिरहेको अवस्थामा प्रधानाध्यापकले उहाँहरूबिच हिसाबकिताबको विषयलाई लिएर विवाद भयो, तर म टाढा भएकाले लात्ती हानेको नदेखेको अध्यक्ष खत्रीले इन्सेक प्रतिनिधिसँगको फोन सम्पर्कमा बताउनु भयो ।

पत्नीलाई लात्ती हान्ने प्रधानाध्यापकविरूद्ध असार ४ गते जिल्ला प्रहरी कार्यालयमा उजुरी दिएको पीडितका ४६ वर्षीय पति कृष्ण कार्कीले बताउनु भयो ।

पानी पेटमा लात्ती लागेका कारण पीडितको निरन्तर पेट दुख्ने र पिसाब नरोकिने समस्या भएपछि पीडितलाई जिल्ला अस्पतालले नोवेल अस्पताल विराटनगर रिफर गरेको पीडितका पति कृष्ण कार्कीले बताउनु भयो ।

जिल्ला प्रहरी कार्यालयका इन्स्पेक्टर शङ्करप्रसाद चौधरीले पीडितलाई उपचारका लागि नोवेल अस्पताल विराटनगर लगिएको बताउनु भयो ।

पीडित पक्षले आरोपितविरूद्ध असार ४ गते जिल्ला प्रहरी कार्यालयमा मौखिक उजुरी दिएको  इन्स्पेक्टर चौधरीले बताउनु भयो ।

अस्पतालले पीडितलाई डिस्चार्ज दिएपछि दुवै पक्ष राखि घटनाका विषयमा जानकारी लिएर कानुनी कारबाही अघि बढाउने इन्स्पेक्टर चौधरीले बताउनु भएको छ ।

तारानाथ फुयल