समाचारहरू

बुलिङ्गटार गाँउपालिका–६ अत्रौलीका १७ वर्षीय खुमन सार्की आफ्नै विद्यालयका प्रधानाध्यापक ओमकुमार श्रेष्ठको कुटपिटबाट घाइते भएका छन् ।

प्राथनाको समयमा विद्यार्थी ढिलो आएको भन्दै शिव माध्यामिक विद्यालयका प्रधानाध्यापक श्रेष्ठले असोज २ गते सार्की सहित नौ जना विद्यार्थीलाई कुटपिट गरेको पीडित खुमन सार्कीका बुवा बिरबहादुर सार्कीले बताए । प्रधानाध्यापक श्रेष्ठको कुटाइले खुमन सार्कीको देब्रे कानबाट रगत बगेको छ ।

कानबाट रगत बग्न नरोकिएपछि नारायणी सामुदायिक अस्पताल, भरतपुर चितवनमा उपचारका लागि लगिएका सार्कीलाई अस्पतालले त्यहाँ उपचार हुन नसक्ने भन्दै पुरानो मेडिक कलेज भरतपुर रिफर गरेका थियो । सार्कीको अहिले पुरानो मेडिकल कलेज भरतपुरमा उपचार भइरहेको पीडितका बुवाले बताए ।

घाइते सार्की विद्यालयबाट दिउँसो घर आएपछि घटनाबारे थाहा भएको थियो । विकट पहाडी क्षेत्र र असोज २ गते भएको बन्दका कारण सार्कीलाई राति मात्रै अस्पलात पु¥याइएको थियो ।

प्रधानाध्यापक श्रेष्ठले प्रार्थना चलेको बेलामा बिद्यालय ढिलो आएको आरोपमा खुमनसहित मनबहादुर आले, मनोज आले, होमबहादुर राना, कुलबहादुर सार्की, सन्तबहादुर थापा, रविराज राना, नरबहादुर सार्की र केशब घिमिरेलाई कुटपिट गरेको स्थानीय कृष्ण बहादुर सार्कीले बताए ।

तिर्थराज डुम्रे