समाचारहरू

प्रधानमन्त्री पुष्पकमल दाहाल (प्रचण्ड) विरुद्ध ०७९ चैत ७ गते काठमाडौँ महानगरपालिका-१० थापागाउँमा नाराबाजी गर्ने तीन जना युवालाई पाँच दिन थुनामा राखेर अनुसन्धान गर्न प्रहरीले अनुमति पाएको छ ।

जिल्ला प्रशासन कार्यालय काठमाडौँले गिरफ्तार गरेका तीन युवालाई चैत ८ गते पाँच दिन थुनामा राखेर अनुसन्धान गर्न प्रहरी वृत्त तिनकुनेलाई अनुमति दिएको हो ।

५८ औँ अन्तर्राष्ट्रिय जातीय भेदभाव उन्मुलन दिवसका अवसरमा आयोजित कार्यक्रममा चैत ७ गते प्रधानमन्त्री पुष्पकमल दाहाल प्रचण्डले थापागाउँस्थित बानेश्वर ब्यांकेटमा सम्बोधन गर्न जाँदै गर्दा नाराबाजी गरेको आरोपमा सोलुखुम्बुका २३ वर्षीय उद्धव बस्नेत, बाग्लुङका ३० वर्षीय सोम शर्मा र बझाङका १८ वर्षीय विप्लव खड्कालाई प्रहरीले गिरफ्तार गरेको थियो ।

गिरफ्तारीमा परेकाहरूलाई प्रहरीले भ्यानमा राख्ने क्रममा मुख समेत थुनेका थिए ।

जिल्ला प्रशासन कार्यालयले थुनामा राखेर अनुसन्धान गर्न अनुमति दिएसँगै आरोपितहरूलाई प्रहरी वृत्त नयाँ बानेश्वरको हिरासतमा राखेर अभद्र व्यवहारको कसुरमा अनुसन्धान अघि बढाइने जिल्ला प्रहरी परिसर काठमाडौँका एसपी तथा प्रवक्ता सीताराम रिजालले इन्सेक प्रतिनिधिसँग बताउनु भयो ।

विमल पौडेल