समाचारहरू

प्रदेश २ मा रिक्त चार सदस्य सिटका लागि राष्ट्रिय सभा निर्वाचनको मतदान जनकपुरधाम स्थित महेन्द्रनारायाण निधि साँस्कृतिक केन्द्रमा सुरु भएको मतदान अधिकृत डा. शम्भु साहले जानकारी दिनु भएको छ ।

निर्धारित समय १० बजेदेखि कडा सुरक्षाका बिच शान्तिपूर्ण रुपमा मतदान सुरु भएको हो । मतदान स्थलको चारैतिर सुरक्षा व्यवस्था कडा बनाइएको छ । मतदान केन्द्रभित्र सञ्चारकर्मीलगायत मतदाताहरूलाई समेत मोबाइल लैजान निषेध गरिएको छ ।
प्रदेश २ मा राष्ट्रिय सभा निर्वाचनका १ सय ७ प्रदेश सांसद र १ सय ३६ स्थानीय तहका प्रमुख तथा उपप्रमुख गरी जम्मा ३ सय ७९ मतदाता रहेका छन् ।
प्रदेश २ मा नेकपा र राजपा बिच गठबन्धन गरिएको छ । नेकपा र राजपाको गठबन्धनमा १ सय ९४ मतदाता रहेका छन् । नेपाली काँग्रेस र समाजवादी बिच पनि गठनबन्धन रहेको छ । नेपाली काँग्रेस र समाजवादीको गठबन्धनमा १ सय ८४ मतदाता  रहेका छन् । एक जना स्वतन्त्र मतदाता पनि रहनु भएको छ ।
प्रदेश २ का मुख्यमन्त्री लालबाबु राउतले सबैभन्दा पहिले मतदान गर्नु भएको छ । आठ ओटै जिल्लाका मतदाता प्रदेश सांसद, स्थानीय पालिकाका प्रमुख तथा उपप्रमुख मतदान स्थलमा पुग्नु भइसकेको छ ।
प्रदेश नंं. २ मा राष्ट्रिय सभाको चार सदस्यका लागि जारी निर्वाचनमा आठ जनाले उम्मेदवारी दिनु भएको छ ।

नेकपा र राजपाको गठबन्धनबाट महिला एक पदमा नेकपाको तर्फबाट तुलसा कुमारी दाहाल, दलित पदमा नेकपाको तर्फबाट राधेश्याम पासवान, अल्पसङ्ख्यक पदबाट राजपाबाट शेखरकुमार सिंह र खुल्ला तर्फ राजपाका मृगेन्द्रकुमार सिंह चुनावी मैदानमा रहनु भएका छन् ।
नेपाली काँग्रेस र समाजवादीको गठबन्धनबाट महिला एक पदमा नेपाली काँग्रेसको तर्फबाट नगिना यादव, दलित पदमा समाजवादी पार्टीको तर्फबाट रामपृत पासवान, अल्पसङ्ख्यक पदमा नेपाली काँग्रेसबाट भोला पञ्जियार र खुल्ला पदमा समाजवादी पार्टीको तर्फबाट अनिरुद्धकुमार सिंह चुनावी मैदानमा रहनु भएका छन् ।
मतदान बेलुका ४ः०० बजेसम्म हुने मतदान अधिकृत डा.शम्भु साहले जानकारी दिनु भएको छ । मतदान सम्पन्न भएलगतै मतगणना गरिने उहाँले बताउनु भएको छ ।
गठबन्धनका नेताहरुले आ–आफना मतदाताहरुलाई दुई दिन अगाडी नै एकै ठाउँमा जम्मा गरेर प्रशिक्षण दिनुको साथै नमुना मतदान समेत गराएका थिए ।

दिपेन्द्रप्रसाद सिंह