समाचारहरू

मुख्य निर्वाचन अधिकृत प्रमेश पोखरेलले पत्रकार र निर्वाचन पर्यवेक्षकलाई सूचना तथा समाचार सङ्कलनमा रोक लगाएका छन् ।

मुख्य निर्वाचन अधिकृतले सूचना सङ्कलनमा रोक लगाएपछि पत्रकारहरूले त्यसको विरोध गरेका छन् ।

जिल्लामा मतगणनाका क्रममा प्रतिनिधिसभाको मतपत्र प्रदेशसभाको मतपेटिका र प्रदेशसभाको मतपेटिका प्रतिनिधिसभाको मतपेटिका परेको समाचार प्रकाशन भएपछि त्यसमा असन्तुष्टि जनाउँदै मुख्य निर्वाचन अधिकृतले सूचना सङ्कलनमा रोक लगाएका हुन् ।

मुख्य निर्वाचन अधिकृत पोखरेलले पत्रकारसँगै निर्वाचन पर्यवेक्षकलाई समेत मतगणनाको पर्यवेक्षणमा अवरोध सिर्जना गरेका छन् ।

अधिकृत पोखरेलले आफूलाई मिडियाले सहयोग नगरेको भन्दै समाचार सङ्कलनमै रोक लगाएपछि पत्रकारहरू मङ्सिर ६ गते विज्ञप्ति जारी निर्वाध रूपमा सूचना सङ्कलन गर्न पाउने माग गरेका छन् ।

सदरमुकाम म्याङलुङको सिंहवाहिनी माविमा अपरान्ह ३ वजे बाट शुरू मतगणनास्थल परिसरमा समाचार सङ्कलनमा लागि पुगेका पत्रकारलाई अपमानजनक व्यवहार गरी बाहिर जान निर्देशन दिएको पत्रकारहरूको आरोप छ ।

छथर गाउँपालिका–१ कार्यालय (ख) मतदान केन्द्रमा प्रदेशसभा सदस्यको मतपत्र नदिई कर्मचारीले प्रतिनिधिसभा सदस्य तर्फको मत पत्र दिएको खुलेको थियो । त्यसपछि राजनीतिक दल, उम्मेदवार र मुख्य निर्वाचन अधिकृतको कार्यालयबिच विवाद सृजना भएको थियो ।

सोही विवादको बिषयलाई लिएर प्रकाशित समाचारप्रति आफू प्रतिकुल समाचार आएको भन्दै मुख्य निर्वाचन अधिकृत पोखरेलले मतगणना अवधिभर कुनै पत्रकारलाई मतगणना परिसरमा प्रवेशमा रोक लगाएका हुन् ।

प्रेस तथा अभिव्यक्ति स्वतन्त्रता, लोकतान्त्रिक शासन व्यवस्था र विधिको शासनका पक्षधर पत्रकार, सञ्चारकर्मीहरूलाई मतगणना परिसरमा लगाएको रोकको विरोध गर्दै महासङ्घले गम्भीर ध्यानाकर्षण भएको जनाएको छ ।

जिल्लाका सञ्चारकर्मीहरूलाई स्वतन्त्र, निर्वाध, सुरक्षित सरल र सहजढङ्गबाट मतगणनाको समाचार सङ्कलन र सम्प्रेषण गर्ने वातावरण सृजना गरिदिन निर्वाचन आयोग समक्ष महासङ्घले माग गरेको छ ।

नेपालको संविधानले २०७२ ले धारा २७ मा सूचनाको हक सम्बन्धी व्यवस्था गरेको छ । प्रत्येक नागरिकलाई आफ्नो वा सार्वजनिक सरोकारको कुनै पनि विषयको सूचना माग्ने र पाउने हक हुनेछ भन्ने व्यवस्था गरेको छ ।

सुरेश खत्री