समाचारहरू

मङ्सिर ४ गते हुने प्रतिनिधिसभा सदस्य तथा प्रदेशसभा सदस्य निर्वाचन ०७९ का लागि जिल्लाको दुर्गम उत्तरी क्षेत्र भोटखोला गाउँपालिकामा मतदान सामग्री पठाइएको छ ।

सदरमुकाम खाँदबारीबाट भोटखोला गाउँपालिका पुग्न चारदेखि पाँच दिनसम्म लाग्छ । मुख्य निर्वाचन अधिकृतको कार्यालयले भोटखोला गाउँपालिकाको माथिल्लो क्षेत्रमा मतदान सामग्री र मतदान अधिकृतसहितको टोली पठाएको हो ।

पहिलो चरणमा भौगोलिक रूपमा विकट र दुर्गम मानिएको भोटखोला गाउँपालिकाको दूधपोखरी आधारभूत विद्यालय थुदाम, हिमालय आधारभूत विद्यालय किमाथाङ्का र ज्योती आधारभूत विद्यालय रिदाकका लागि मतदान सामग्रीसहित मतदान अधिकृत टोली कात्तिक २७ गते पठाइएको मुख्य निर्वाचन अधिकृत टेकनाथ गौतमले बताउनु भयो ।

जिल्लाको निकै दुर्गम र विकट क्षेत्र किमाथाङ्का, रिदाक र थुदामसहित तीन ओटा मतदानकेन्द्रका लागि मतपत्र र मतपेटिकासहित कर्मचारी र सुरक्षाकर्मी पठाइएको छ ।

सदरमुकाम खाँदवारीबाट भोटखोला गाउँपालिकाको मतदान केन्द्रमा झण्डै एकसाता समय लाग्ने भएकाले कात्तिक २७ गतेदेखि मतदान सामग्री पठाउन थालिएको मुख्य निर्वाचन अधिकृत गौतमले बताउनु भयो ।

भोटखोला गाउँपालिकामा पाँच ओटा वडामा १० ओटा मतदानकेन्द्र कायम गरिएको छ । भोटखोला गाउँपालिका हिमाली र अति विकट क्षेत्र भएका कारण पैदल हिड्नु पर्छ ।

गाउँपालिकासम्म पुग्न गाडी र पैदल हिड्नु पर्ने भएकाले आवश्यक कपडासहित औषधि, खानपिन लगायतका सामाग्री बोक्न निर्वाचनमा खटिने कर्मचारीलाई निर्देशन दिइएको थियो ।

भोटखोला क्षेत्रमा फोन समस्या हुन सक्ने र निर्वाचनको अवधिमा समस्या आए तत्काल कुनै माध्यमबाट भए सम्पर्क गर्न मतदान अधिकृतलाई मुख्य निर्वाचन अधिकृत गौतमले निर्देशन दिनु भएको छ ।

जिल्लामा दुई अस्थायीसहित १ सय ६४ ओटा मतदानकेन्द्र छन् । जिल्लामा एक प्रतिनिधिसभा र  दुई प्रदेशसभा निर्वाचन क्षेत्र छ । जिल्लामा १ लाख १७ हजार ५ सय ५४ जना मतदाता रहेको जिल्ला निर्वाचन कार्यालयले जनाएको छ ।

भविन कार्की