समाचारहरू

अनौपचारिक क्षेत्र सेवा केन्द्र (इन्सेक) का अध्यक्ष डा. कुन्दन अर्यालले मधेस प्रदेश प्रमुख माननीय हरिशन्चन्द्र मिश्रलाई २०८० जेठ २२ गते नेपाल मानव अधिकार वर्ष पुस्तक २०२३ हस्तान्तरण गर्नु भएको छ ।

वर्ष पुस्तक हस्तान्तरण गर्दै अध्यक्ष अर्यालले मधेस प्रदेशका सामाजिक र साँस्कृतिक सवालहरूलाई समाधानका लागि प्रदेश सरकारसँग इन्सेकको साझेदारी र समन्वय सदैव रहिरहने बताउनु भयो ।

उहाँले मधेश प्रदेशमा मानव अधिकारका सवालहरूलाई संवोधनका लागि इन्सेकले थप जिम्मेवारीका साथ कार्यहरू गर्न तयार रहेको र यसमा प्रदेश सरकारको सहकार्य र सुझाव आवश्यक रहेको बताउनु भयो ।

मधेस प्रदेश प्रमुख मिश्रले प्रविधिको गलत प्रयोगका कारण सिर्जित सामाजिक समस्याहरूले समाजमा मानव अधिकार उल्लङ्घन र ज्यादतीका घटनाहरूको संख्यामा वृद्धि भएका कारण इन्सेकले यस्ता खालका समस्याहरूको उजागर गर्दै नागरिक सचेतनामा वृद्धि गर्नु पर्ने सुझाव व्यक्त गर्नु भयो ।

इन्सेकका सुचना अधिकारी कृष्ण गौतमले मानव अधिकारको संरक्षण र संवर्द्धनका लागि इन्सेकले नेपाल भरिका मानव अधिकार उल्लङ्घन र ज्यादतीका घटनाहरूलाई अभिलेख, मानव अधिकारको अवस्था विश्लेषण र सामाजिक न्यायको स्थापनार्थ कार्य गर्दै आएको बताउनु भयो ।

इन्सेक मधेश प्रदेश कार्यालय संयोजक राजु पासवानले मानव अधिकार शिक्षा कार्यक्रम, पीडितलाई न्यायीक प्रक्रियामा सहयोग, आर्थिक सहायता प्रदान र विभिन्न जनचेतनामूलक अभियानमार्फत इन्सेक मधेस प्रदेशमा सक्रिय रहेर कार्य गर्दै आएको बताउनु भयो ।

मधेस प्रदेश कार्यालय