समाचारहरू

दोस्रो चरणको स्थानीय तहको निर्वाचन अन्तर्गत असार ४ गते उम्मेदवारी दर्ताको काम सम्पन्न भएको छ ।

इन्सेक डडेल्धुरा जिल्ला प्रतिनिधि भुपेन्द्र विष्टका अनुसार सात ओटै स्थानीय तहमा उत्साहका साथ उम्मेदवारी दर्ता भएको मुख्य निर्वाचन अधिकृतको कार्यालयले जनाएको छ ।

इन्सेक कञ्चनपुर जिल्ला प्रतिनिधि कोमलनिरञ्जन भाटका अनुसार कञ्चनपुर जिल्लाका सबै स्थानीय तहमा शान्तिपूर्ण वातावरणमा उम्मेदवारी मनोनयन दर्ताको काम भएको छ ।

कञ्चनपुर जिल्लामा सात ओटा नगरपालिका र दुई ओटा गाउँपालिका गरी नौ ओटा स्थानीय तह रहेका छन् । सबै स्थानीय तहमा २ लाख ३५ हजार ७ सय ३५ मतदाता रहेका छन् ।

इन्सेक अछाम जिल्ला प्रतिनिधि शिवराज ढुङ्गानाका अनुसार अछाम जिल्लाका १० ओटै स्थानीय तहमा दलहरूले बाजागाजासहित उल्लासमय तरिकाले मनोनयन पत्र दर्ता गरेका छन् । चार नगरपालिका र ६ गाउँपालिकाका प्रमुख तथा उपप्रमुख र ९१ वडामा मनोनयन दर्ता गरिएको सम्बन्धित निर्वाचन अधिकृतको कार्यालयहरूले जानकारी दिएका छन् ।

जिल्लामा कुनै अप्रिय घटना नभएकोले शान्तिपूर्ण रूपमा मनोनयन दर्ता कार्य भएको प्रमुख जिल्ला अधिकारी शङ्करबहादुर विष्टले जानकारी दिए । अछामका ४७ मतदान केन्द्र अति सम्वेदनशील, ६६ ओटा सम्वेदनशील र १६ ओटा सामान्य मतदान केन्द्रका रूपमा सुरक्षा विश्लेषण गरिएको छ ।

अछाम जिल्लामा २० जना प्रमुख तथा उपप्रमुख र ९१ वडामा ४ सय ५५ जनप्रतिनिधि निर्वाचित हुनेछन् । यस्तै दलित महिला र खुल्ला महिलामा ९१/९१ जना निर्वाचित हुनेछन् । अछाममा १ लाख २७ हजार ७ सय ४२ मतदाता रहेकोमा १ सय ८५ मतदान केन्द्र रहेका छन् ।

निर्वाचनपछि हुने प्रत्येक नगर सभाले तीन जना र गाउँ सभाले दर्ुइ जना अल्पसङ्ख्यक, अपाङ्गता भएका, सीमान्तकृत समुदाय मध्येबाट जनप्रतिनिधिहरू चुन्नुपर्ने व्यवस्था रहेको छ । अछाममा १ लाख २७ हजार ७ सय ४२ मतदाताले १ सय २९ मतदानस्थलमा मतदान गर्नेछन् ।

अनलाइन डेस्क