समाचारहरू

प्रदेश नम्बर ५ अन्तर्गतका ६ जिल्लामा असार १४ गते हुने स्थानीय तहको निर्वाचनका लागि उम्मेदवारी दर्ता सम्पन्न भएको छ ।

प्रदेश नम्बर ५ अन्तर्गतका बाँके, बर्दिया, दाङ, रोल्पा, प्यूठान र रूकुम जिल्लाका मुख्य निर्वाचन अधिकृतको कार्यालयमा राजनीतिक दलका प्रतिनिधिहरूले उम्मेदवारी दिएको समाचार इन्सेकका सम्बन्धित जिल्ला प्रतिनिधिले जानकारी गराएका छन् ।

इन्सेक जिल्ला प्रतिनिधिहरूले स्थानीय तहको उम्मेदवारी दर्ता कार्यक्रमको प्रत्यक्ष अनुगमन गरेका थिए । बाँकेको बैजनाथ गाउँपालिकाबाहेक अन्य जिल्लाका स्थानीय तहमा शान्तिपूर्वक उम्मेदवारी दर्ता भएको पाइएको छ । उम्मेदवारी दर्ताका क्रममा बाँके जिल्लामा राजनीतिक दलहरूले बालबालिकाको प्रयोग गरेका थिए ।

रूकुम जिल्ला प्रतिनिधि आदर्श केसीका अनुसार तीन ओटा स्थानीय तहमा मनोनयन दर्ता शान्तिपूर्ण रूपले सम्पन्न भएको छ । नौ ओटा स्थानीय तहमध्ये वैशाख ३१ गते ६ ओटा स्थानीय तहमा निर्वाचन भइसकेको छ ।

दोस्रो चरणको निर्वाचनको लागि सिस्ने, भुमे र पुथाउतरगङ्गा गाउँपालिकामा शान्तिपूर्ण तरिकाले मनोनयन दर्ता गरेको जिल्ला प्रहरी कार्यालय रूकुमका इन्स्पेक्टर थमन रम्जालीले जानकारी दिए । तर, अबेरसम्म कहाँ कति को उम्मेद्धवार भए भन्ने नामावली सञ्चार असुविधाका कारण आइनसकेको इन्स्पेक्टर रम्जालीले जानकारी दिए । पूर्वी रूकुममा केही दिनदेखि सञ्चार सुविधामा समस्या हुँदा समयमै खबर प्राप्त गर्न समस्या भइरहेको छ ।

रोल्पा जिल्ला प्रतिनिधि माधव ओलीका अनुसार रोल्पामा उत्साहका साथ उम्मेदवारी दर्ता सम्पन्न भएको छ भने थबाङमा नेपाल कम्युनिष्ट पार्टी निकटका कार्यकर्ताले स्वतन्त्र उम्मेदवारी दिएका छन् । २० वर्षपछि हुन लागेको स्थानीय तहको निर्वाचनका लागि रोल्पामा पर्व मनाए झैँ उत्साहका साथ उम्मेदवारी दर्ता गराएका छन् ।

१० वर्षे सशस्त्र द्वन्द्वको उद्गम थलो रोल्पामा वर्षौँ देखिको प्रतिक्षापछि निर्वाचन हुन लागेकोमा विभिन्न दलका नेताहरूले उत्साहका साथ उम्मेदवारी दिएका हुन् ।

नौ गाउँपालिका र एक नगरपालिका रहेको रोल्पामा नगरपालिकामा मेयर पदमा ठूला तीन दलसहित स्वतन्त्र तीन जनाको उम्मेदवारी परेको छ ।

रोल्पाको थबाङमा स्वतन्त्र उम्मेदवार

संविधान सभाको दास्रो निर्वाचनमा 'शून्य' मतदान गरेको थबाङमा दुई ओटा स्वतन्त्र उम्मेदवारी परेको छ । निर्वाचन बहिष्कार गरेको नेत्रविक्रम चन्द विप्लव नेतृत्वको नेपाल कम्युनिष्ट पार्टी निकट विद्यार्थी नेता अमित घर्तीमगरले थबाङ गाउँपालिकाको प्रमख पदमा स्वतन्त्र उम्मेदवारी दर्ता गराएका हुन् ।

यस्तै उक्त गाउँपालिकाको प्रमुखमा भक्तबहादुर घर्तीले पनि स्वतन्त्र उम्मेदवारी दिएका छन् । साविकको थबाङ गाविस नेकपाको वर्चस्व रहेको मानिन्छ । यस्तै थबाङ गाउँपालिकाको प्रमुख पदमा काङ्ग्रेसले उम्मेदवारी दिएको छैन । उपप्रमुख र अन्य पदमा मात्रै काङ्ग्रेसले उम्मेदवारी दिएको छ । काङ्ग्रेसले प्रमुखमा भने स्वतन्त्र उम्मेदवार अमित घर्तीमगरलाई मतदान गर्ने काङ्ग्रेसबाट उपप्रमुखका उम्मेदवार श्रीकुमारी रोकाले बताइन् । यस्तै थबाङ गाउँपालिकामा नेकपा एमाले, माओवादी केन्द्रलगायत अन्य साना दलहरूले पनि विभिन्न पदमा उम्मेदवारी दर्ता गराएका छन् ।

दाङ जिल्ला प्रतिनिधि जेएन सागरका अनुसार दुई उमनपा, एक नपा र सात गाउँपालिकामा हुन गइरहेको स्थानीय तहको निर्वाचनका लागि असार ४ गते राजनीतिक दलहरूले शान्तिपूर्ण र उत्साह पूर्वक उम्मेदवारी दर्ता गराएका छन् ।

बाँके जिल्ला प्रतिनिधि विनोद पाण्डेका अनुसार जिल्लामा सबै गाँउपालिकामा उम्मेदवारी दर्ता सम्पन्न भएको छ । राजनीतिक दलहरूले बाजा गाजासहित मुख्य निर्वाचन अधिकृतको कार्यालय पुगेर मनोनयन दर्ता गराएका छन् । नेपाली काङ्ग्रेस, नेकपा एमाले, माओवादी केन्द्र, राप्रपा, फोरम लोकतान्त्रिक, सङ्घीय समाजवादी फोरमलगायतले आचारसंहिता विपरीत र्‍यालीमा बालबालिकाहरूको प्रयोग गरेका छन् ।

माओवादी केन्द्र र नेकपा एमालेका कार्यकर्ताबीच झडप

बाँकेको बैजनाथ गाउँपालिकामा नेकपा एमाले र माओवादी केन्द्रका कार्यकर्ताबिच असार ४ गते झडप भएको इलाका प्रहरी कार्यालय चिसापानीका इन्स्पेक्टर कमल रजौरेले बताए । झडपमा दुई जना प्रहरीसमेत सात जना घाइते भएको इलाका प्रहरी कार्यालय कोहलपुरका डिएसपी सुरेश काफ्लेले बताए । झडपलाई नियन्त्रणमा लिन प्रहरीले तीन राउण्ड अश्रु ग्याँस र एक राउण्ड हवाइ फायर गरेको प्रत्यक्षदर्शी दलबहादुर सुनारले बताए । पुनः झडप हुने सम्भावनालाई मध्यनजर गर्दै स्थानीय प्रशासनले थप सुरक्षाकर्मी परिचालन गरेपछि स्थिति सामान्य बनेको थियो ।

बर्दिया जिल्ला प्रतिनिधि मानबहादुर थारूका अनुसार जिल्लामा शान्तिपूर्ण तरिकाले उत्साहजनक रूपमा मनोनयन दर्ता सम्पन्न भएको छ । जिल्लाको आठ ओटा स्थानीय तहमा असार ४ गते राजनीतिक दल र स्वतन्त्र उमेदवारहरूले शान्तिपूर्ण तरिकाले उत्साहजनक रूपमा आ-आफ्नो मनोनयन दर्ता गराएका हुन् ।

बर्दिया जिल्लामा गुलरिया नपा, बाँसगढी नपा, राजापुर नपा, मधुवन नपा, ठाकुरबाबा नपा, बारबर्दिया नपा, गेरूवा गाउँपालिका, बढैयाताल गाउँपालिका गरी आठ तहमा असार १४ गते निर्वाचन हुँदै छ ।

मनोनयन दर्ता गर्न आएका जुलुसहरूमा आचारसंहिता विपरीत टिसर्ट लगाउनुको साथै झण्डा बोकाएर बालबालिकाहरूको पनि प्रयोग भएको थियो ।

यसैबीच बर्दियामा राजपाका कार्यकर्ता केशव यादव, अशेश्वर ठाकुर र सुरेश शुक्लालाई असार ३ गते प्रहरीले गुलरियाबाट गिरफ्तार गरेको छ । उनीहरूको विषयमा प्रहरीले कुनै प्रतिकृया दिएको छैन । जिल्लामा शान्ति सुरक्षाको राम्रो व्यवस्थाका लागि बाक्लो रूपमा सुरक्षाकर्मी खटाइएको थियो । कुनै पनि ठाउँमा कुनै किसिमको घटना नभएको जिल्ला प्रहरी कार्यालय बर्दियाका एसपी भरतबहादुर बोहराले बताए ।

प्यूठान जिल्ला प्रतिनिधि रविन्द्र पाण्डेका अनुसार जिल्लाका नौ ओटा स्थानीय तहमा शान्तिपूर्वक उत्साहजनक रूपमा राजनीतिक दलहरूले उम्मेदवारी दर्ता गराएका छन् । निर्वाचन कार्यालयले दलहरूलाई पालैपालो उम्मेदवारी दर्ताको प्रकृया मिलाएको हुँदा जिल्लामा कुनै अप्रिय घटना भएन । उम्मेदवारी दर्ताको अनुगमन राष्ट्रिय मानव अधिकार आयोग क्षेत्रीय कार्यालय नेपालगञ्जको एक टोलीले गरेको थियो ।

इन्सेक क्षेत्रीय कार्यालय, नेपालगञ्ज