समाचारहरू

(अपडेट ३:३० बजे)

गोरखा जिल्ला प्रतिनिधिका अनुसार जिल्लामा अहिले सम्म ४५ प्रतिशत मत खसेको जिल्ला निर्वाचन कार्यालयले जनाएको छ । चुम नुब्री गाउँपालिका र धार्चे गाउँपालिकामा भने ७० प्रतिशत मत खसेको मुख्य निर्वाचन अधिकृत नारायण सापकोटाले जानकारी दिए ।

मनाङ जिल्लामा अहिलेसम्म ६७.३ प्रतिशत मतदान सम्पन्न भएको जिल्ला निर्वाचन कार्यालयले जनाएको छ । मुख्य निर्वाचन अधिकृत दिपक ढकालले ५ हजार ८ सय ८१ मतदाता रहेको जिल्लामा दिउँसो १ः३० बजेसम्म ३ हजार ९ सय ५८ जना मतदाताले मतदान गरिसकेको जानकारी दिए ।

मुस्ताङ जिल्लामा अहिलेसम्म ६२ प्रतिशत मतदान सम्पन्न भएको जिल्ला निर्वाचन कार्यालयले जनाएको छ । मुख्य निर्वाचन अधिकृत बलराम त्रिपाठीले अहिलेसम्म ६८ प्रतिशत मत खस्ने अनुमान गरिएको जिल्लामा अहिलेसम्म शान्तिपुर्ण रूपमा मतदान भइरहेको जानकारी दिए ।

म्याग्दी जिल्ला प्रतिनिधि अमृत बास्कुनेका अनुसार प्रतिनिधि तथा प्रदेश सभा निर्वाचन अन्तर्गत पहिलो चरणमा भएको म्याग्दी जिल्लाको निर्वाचनमा अहिलेसम्म करिब ५५ प्रतिशत मत खसेकेा जिल्ला निर्वाचन कार्यालयले जनाएको छ । जिल्ला निर्वाचन कार्यालयका कार्यालय प्रमुख केदार पौडेलले अहिले सम्म जिल्लामा शान्तिपुर्ण तवरले मतदान भइरहेको बताए । म्याग्दी जिल्लामा ७५ हजार ५ सय ३८ मतदाता रहेका छन् भने १ सय ६ मतदान केन्द्र रहेका छन् ।

बाग्लुङ जिल्ला प्रतिनिधिका सिर्जना पन्तका अनुसार जिल्लामा अहिलेसम्म ४५ प्रतिशत मत खसेको जिल्ला निर्वाचन कार्यालयले जनाएको छ । जिल्लामा अहिले सम्मको मतदानको अवस्था शान्तिपुर्ण रूपमा चलिरहेको छ ।

लमजुङ जिल्ला प्रतिनिधि दलबहादुर मजाकोटीका अनुसार जिल्लामा अहिलेसम्म ३५ प्रतिशत मत खसेको जिल्लाका मुख्य निवाचन अधिकृत कोमल प्रसाद आचार्यले जानकारी दिए । हालसम्म जिल्लाको अवस्था शान्तिपुर्ण रहेको छ ।

(अपडेट १०:३० बजे)

गोरखा जिल्ला प्रतिनिधि हरिराम उप्रेतीका अनुसार बिहान सात बजेदेखि नै शान्तिपुर्ण रूपमा मतदान कार्य सुरू भएको छ ।

मतदान अधिकृत निर्माण घिमिरेका अनुसार राजनीतिक दलका प्रतिनिधि नआएका कारण गोरखाको चुम नुब्री गाउँपालिका-२ स्थित ल्हो आधारभुत प्राथमिक विद्यालय मतदान केन्द्रमा करिब एक घण्टा ढिलो गरी मतदान कार्य सुरू भएको थियो ।

त्यसैगरी मङ्सिर १० गते नै गोरखा नपा-११ सिर्दि खोला नजिकै मतदातालाई आतङ्कित पार्ने उद्देश्यले ढुटो, युरिया मल र सलाइको बट्टा पोको पारेर राखेको भेटिएपछि जिल्ला प्रहरी कार्यालय गोरखाले त्यसलाई निश्तेज पारेको जिल्ला प्रहरी कार्यालय गोखराले जनाएको छ ।

यस्तै गण्डकी गाउँपालिका-४ फुजेल स्थित कालिका आधारभुत विद्यालय मतदान केन्द्र नजिकै बम विष्फोट भएको छ । मतदान अधिकृत नारायणबावु अर्यालका अुनसार बिहान भएको विष्फोटले मतदानमा भने प्रभाव परेको छैन ।

बाग्लुङ जिल्ला प्रतिनिधि सिर्जना पन्तका अनुसार जिल्लामा पनि शान्तिपुर्ण रूपमा मतदान कार्य भइरहेको छ । चिसोका कारण बिहानीपख मतदाता न्यून सङ्ख्यामा मतदानस्थलमा पुगेका थिए । बडीगाड गाउँपालिककाको डाँडागाउँमा बिहान आठ बजेतिर मतदानस्थल नजिकै सुतली बम फेला परेपछि नेपाली सेनाको टोलीले निष्कृय पारेको जिल्ला प्रहरी कार्यलयका एसपी हिमालय प्रकाश श्रेष्ठले जानकारी दिए ।

म्याग्दी जिल्ला प्रतिनिधि अमृत बास्कुनेका अनुसार हालसम्म शान्तिपुर्ण रूपमा मतदान प्रक्रिया चलिरहेको छ । बिहान सात बजेबाट सुरू भएको मतदानमा मतदाताको उत्साहजनक सहभागिता छ ।

लमजुङ जिल्ला प्रतिनिधि दलबहादुर मजाकोटीका अनुसार कोलासोथर गाउँपालिका सिङ्दीस्थित अन्नपुर्ण मतदान केन्द्रमा बिहान केहीबेर मतदाताबिच विवाद हुँदा अवरूद्ध भएको मतदान कार्य पुनः सुरू भएको छ । अहिलेसम्म शान्तिपुर्ण रूपमा मतदान प्रक्रिया चलिरहेको मुख्य निर्वाचन अधिकृत कोमलप्रसाद आचार्यले जानकारी दिए ।

मनाङ जिल्लामा अहिलेसम्म शान्तिपुर्ण रूपमा मतदान कार्य भइरहेको छ । जिल्लामा ज्येष्ठ नागरिक तथा अपाङ्गता भएका ब्यक्तिहरूलाई मतदानमा विशेष प्राथमिता दिइएको जिल्ला निर्वाचन कार्यलयले जनाएको छ । जिल्ला निर्वाचन कार्यलय मुस्ताङले हालसम्म शान्तिपुर्ण रूपमा मतदान प्रक्रिया चलिरहेको जनाएको छ ।

इन्सेक क्षेत्रीय कार्यालय, पोखरा