प्रदेशमै मुकाम स्थापना गरी मुद्दाको छानबिन गर्छौः सुवेदी

  ०७३ पुस २७ गते

सत्यनिरूपण तथा मेलमिलाप आयोगका सदस्य श्रीकृष्ण सुवेदीले प्रदेशस्तरमै मुकाम स्थापना गरी द्वन्द्वकालीन मुद्दाको छानबिन गर्ने बताएका छन् ।

पाँच नम्बर प्रदेशस्तरीय मुकाम स्थापनाको तयारीका लागि दाङ आएका आयोग सदस्य सुवेदीले पुस २७ गते द्वन्द्वपीडित, राजनीतिक दल, नागरिक समाज र सरकारी अधिकृतहरूसँग छुट्टाछुट्टै छलफल गर्दै मुकाम स्थापना गरी तत्काल द्वन्द्वकालीन मुद्दाको छानबिन गरिने बताए ।

उनले मृतक परिवारलाई दिने परिपूरणको तयारी, उजुरीमाथिको छानबिन, मुद्दालाई लिपीबद्ध गराउन र सेवा सुविधा सहितको परिचय पत्र दिलाउने जस्ता कार्यहरूलाई अगाडि बढाइसकिएको समेत जानकारी दिए ।

दाङको तुल्सीपुरमा मुकाम स्थापना गर्ने तयारी भइरहेको जानकारी दिँदै सुवेदीले छानबिनका लागि उच्चअदालत सरकारी वकिल कार्यालयका सहन्यायाधिवक्ताको संयोजकत्वमा तीन सदस्यीय छानबिन समिति बनाउन लागेको समेत जानकारी दिए । समितिका सदस्यहरूमा एकजना उच्च अदालत बार र अनुसन्धानमा अनुभव रहेका एकजनालाई समेटिने सुवेदीले जानकारी दिए ।


जे.एन.सागर