प्रतिबन्धित पार्टीको कार्यकर्ता भएको भन्दै केरकार, प्रशासनले इन्सेक प्रतिनिधिसँग फर्कायो

 

सरकारले प्रतिबन्ध लगाएको नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीको कार्यकर्ता भएको आशङ्कमा लामो समययता प्रहरीको निगरानी र केरकारमा परेका आठराई त्रिवेणी गाउँपालिका–३ का ४३ वर्षीय राजकुमार चुडाललाई जिल्ला प्रशासन कार्यालय ताप्लेजुङले इन्सेक प्रतिनिधिको रोहवरमा घर फर्काएको छ ।

प्रतिबन्धित पार्टीमा क्रियाशील रहेको आशङ्का गर्दै प्रहरी चुडालको घरमा पटकपटक पुगी केरकार गर्न थालेपछि पीडित चुडालले इन्सेक प्रतिनिधि देवराज गुरूङ्गको रोहवरमा सो पार्टीमा डेढ वर्षयता कुनै संलग्नता नरहेको लिखित पत्र चैत २९ गते जिल्ला प्रशासन कार्यालयमा बुझाएपछि उनलाई मानव अधिकारकर्मीको रोहवरमा छोडिएको प्रमुख जिल्ला अधिकारी अनुज भणडरीले बताए ।

पीडित चुडालले आफू स्वतन्त्र रहेको भन्दै कुनै पार्टीमा संलग्न नरही स्वतन्त्रतापूर्वक घरायसी जीवन बिताइरहेको लिखितपत्र बुझाएपछि इन्सेक प्रतिनिधिको रोहवरमा चुडाललाई छाडिएको प्रजिअ भण्डारीको भनाई छ ।

प्रहरीले लामो समययता चुडालमाथि निगरानी गरेको र शङ्कास्पद गतिविधि नदेखिएपछि मानव अधिकारकर्मीको रोहवरमा छोडिएको जिल्ला प्रशासन कार्यालय ताप्लेजुङले जनाएको छ ।


देवराज गुरुङ