समाचारहरू

नेत्रविक्रम चन्द (विप्लव) नेतृत्वको प्रतिबन्धित नेपाल कम्युनिष्ट पार्टीका जिल्ला इन्चार्ज जुगल गाउँपालिका–४ स्थित पाङताङ घर भई हाल भक्तपुर जिल्ला सल्लाघारी बस्ने ३७ वर्षीय प्रयास भनिने गोपाल श्रेष्ठलाई प्रहरीले भदौ ४ गते उनकै कोठाबाट गिरफ्तार गरेको छ ।

मेलम्ची नगरपालिका–१० स्थित शिखरपुरको वडा कार्यालयमा साउन १५ गते राति आगजनी गरेको आरोपमा गिरफ्तार गरिएका श्रेष्ठलाई भदौ ४ गते नै चौतारा ल्याइएको जिल्ला प्रहरी कार्यालयका डिएसपी माधवप्रसाद काफ्लेले बताए ।

हाल जिल्ला प्रहरी कार्यालयको हिरासतमा रहेका आरोपित श्रेष्ठलाई इलाका प्रहरी कार्यालय मेलम्चीले मेलम्ची नगरपालिका–१० स्थित शिखरपुर वडा कार्यालयमा आगजनी गरेको र मेलम्ची नगरपालिका–१ भोटेचौर स्थित एनसेल टावरमा विष्फोट गराएको आरोपमा मुद्दा चलाइएको प्रहरीले जनाएको छ ।

गिरफ्तारीमा परेका श्रेष्ठले इन्सेक जिल्ला प्रतिनिधि नातिबाबु धितालसँगको भदौ ५ गतको भेटमा आफू पार्टीको गतिबिधिमा निष्क्रिय भएको कारणले पार्टीले कारबाही गरेर निष्काशन गरेपछि आफूले हिंसात्मक गतिविधि त्यागेर सामान्य जीवन बिताइरहेको बेला प्रहरीले घर घेराउ गरी आफूलाई गिरफ्तार गरेकोले न्यायालयबाट आफूले न्याय पाउने अपेक्षा गरेको बताए ।

नातिबावु धिताल