समाचारहरू

नक्कली भुटानी शरणार्थी प्रकरणमा गिरफ्तारीमा परेका पूर्व उपप्रधानमन्त्री तथा अर्घाखाँची क्षेत्र नं. १ बाट निर्वाचित प्रतिनिधिसभा सदस्य टोपबहादुर रायमाझी सांसद पदबाट ०८० जेठ १ गते निलम्बन गरिएको छ ।

वैशाख २० गते गिरफ्तार पुर्जी जारी भएपछि फरार रहेका रायमाझीलाई प्रहरीले वैशाख ३१ गते बुढानिलकण्ठ नगरपालिका-५ पासिकोटबाट गिरफ्तार गरेको थियो ।

जिल्ला प्रहरी परिसर टेकुले सांसद रायमाझी गिरफ्तारीमा परेको सूचना जेठ १ गते संसद सचिवालयमा पठाएपछि जेठ १ गते बसेको प्रतिनिधिसभा बैठकमा सभामुख देवराज घिमिरेले रायमाझीलाई सांसद पदबाट निलम्बन गरेको व्यहोरा सदनलाई जानकारी गराउनुभएको थियो ।

प्रहरी गिरफ्तारीमा परेका रायमाझीलाई जेठ १ गते जिल्ला अदालत काठमाडौँका न्यायाधीश केशवप्रसाद अधिकारीको इजलासले तीन दिन हिरासतमा राखेर घटनाबारे अनुसन्धान गर्न प्रहरीलाई अनुमति दिएको छ ।

प्रतिनिधिसभा नियमावली, २०७९ को नियम २४८ मा सांसद गिरफ्तार परेमा संसद सचिवालयलाई जानकारी गराउनुपर्ने व्यवस्था छ । त्यस्तै प्रतिनिधिसभा नियमावली २०७९ को नियम २४८(३) अनुसार संसदहरू फौजदारी मुद्दामा गिरफ्तार परेर पुर्पक्षका लागि थुनामा पठाइएमा निलम्बनमा पर्नेछन् ।

विमल पौडेल