प्रतिनिधिसभा नियमावली २०७९ अनुसार प्रतिनिधिसभाका विषयगत समिति गठन

प्रतिनिधिसभाका १० ओटा विषयगत समितिहरू गठन भएका छन् । प्रतिनिधिसभाको ०८० वैशाख १५ गते बसेको बैठकमा सभामुख देवराज घिमिरेले प्रतिनिधिसभा नियमावली २०७९ अनुसार  विषयगत समितिमा रहने सदस्यहरूको नाम प्रस्ताव गर्नुभएको थियो ।

सभामुख घिमिरेको प्रस्तावलाई प्रतिनिधिसभाले अनुमोदन गरेसँगै संसदका  विषयगत समितिहरू गठन भएका हुन्  ।

प्रतिनिधिसभाको नियमावली अनुसार विषयगत समितिहरूमा अर्थ समिति, अन्तर्राष्ट्रिय सम्बन्ध र पर्यटन समिति, उद्योग तथा वाणिज्य र श्रम तथा उपभोक्ता हित समिति, कानुन, न्याय तथा मानव अधिकार समिति, कृषि, सहकारी तथा प्राकृतिक श्रोत समिति, महिला तथा सामाजिक मामिला समिति, राज्यव्यवस्था तथा सुशासन समिति, पूर्वाधार विकास समिति, शिक्षा, स्वास्थ्य तथा सूचना प्रविधि समिति र सार्वजनिक लेखा समिति रहेका छन् ।

यसैगरी  प्रतिनिधि सभा र राष्ट्रिय सभाका सदस्यहरू समेत रहने गरी  दुई ओटा संयुक्त समिति विषयगत समिति अझै गठन हुन बाँकी रहेका छन् ।

संयुक्त समिति अन्तर्गत संसदीय सुनुवाई समिति र राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्याङ्कन समिति रहेका छन् ।

प्रतिनिधिसभाका संसदीय समितिहरूले सरकारको कामको मूल्याङ्कन तथा विभिन्न विधेयकहरूमा छलफल गरेर टुङ्गो लगाउने काम गर्नेछन् ।

समिति गठन भएसँगै अब नियमावली अनुसार समितिको पहिलो बैठक बसेको पन्ध्र दिनभित्र समितिका सभापति चयन हुनेछन् ।

प्रत्येक समितिको सभापति चयन नभएसम्मका लागि गठित समितिको नेतृत्व उक्त समितिमा रहने ज्येष्ठ सदस्यले गर्नेछन् ।


विमल पौडेल