समाचारहरू

प्रतिनिधिसभाका १० ओटै विषयगत समितिमा ०८० भदौ ११ गते सभापतिहरू चयन हुनुभएको छ । संसदका मुख्य राजनीतिक दलहरूबीच भएको सहमति अनुसार भदौ ११ गते बसेका १० ओटै समितिका बैठकले आ-आफ्ना समितिका सभापति निर्विरोध रुपमा चयन गरेको हो ।

प्रतिनिधिसभाको कानुन, न्याय तथा मानव अधिकार समिति सभापतिमा विमला सुवेदी निर्वाचित हुनुभएको छ भने अर्थ समितिको सभापतिमा सन्तोष चालिसे निर्वाचित हुनुभएको छ । त्यस्तै सार्वनजिक लेखा समितिमा ऋषिकेश पोखरेल र महिला तथा सामाजिक समितिमा किरणकुमार साह सभापतिमा निर्वाचित हुनुभएको छ ।

पूर्वाधार विकास समितिमा राष्ट्रिय प्रजातन्त्र पार्टीका दीपककुमार सिंह सभापति बन्नुभएको छ भने कृषि सहकारी तथा प्राकृतिक स्रोत समितिको सभापतिमा कांग्रेसका आरजु राणा देउवा निर्वाचित हुनुभएको छ ।

त्यस्तै उद्योग तथा वाणिज्य र श्रम तथा उपभोक्ता हित समितिमा जनमतका अब्दुल खान निर्वाचित हुनुभएको छ भने अन्तर्राष्ट्रिय सम्बन्ध र पर्यटन समितिको सभापति राजकिशोर यादव बन्नुभएको छ ।

राज्य व्यवस्था तथा सुशासन समिति सभापतिमा रामहरि खतिवडा निर्वाचित हुनुभएको छ भने शिक्षा, स्वास्थ्य तथा सूचना प्रविधि समितिको सभापति भानुभक्त जोशी बन्नुभएको छ । निर्वाचित सभापतिहरूलाई सभामुख देवराज घिमिरेले भदौ ११ गते नै पद तथा गोपनियताको सपथ गराउनुभएको छ ।

विमल पौडेल