समाचारहरू

३१ औँ स्मृति दिवसको अवसरमा ३१ ओटा विरुवा रोपिएको हो । ककनी गाउँपालिकाका अध्यक्ष सुमन तामाङ, ककनी गाउँपालिका-५ का वडा अध्यक्ष बुद्धराज तामाङ, इन्सेकका अध्यक्ष डा. कुन्दन अर्याल, संस्थापक अध्यक्ष सुशील प्याकुरेल, इन्सेकका कार्यकारी निर्देशक विजयराज गौतम लगायतको सहभागितामा विरुवा रोपिएको हो । ओखर, पैयुँ, कटुस लगायतका विरुवा थाई एयर स्मृति पार्क परिसरमा रोपिएको वडा अध्यक्ष बुद्धराज तामाङले जानकारी दिनुभयो ।

वातावरण संरक्षणमा वृक्षरोपणको महत्व रहेको बताउँदै वृक्ष र मानवको बलियो सम्बन्ध रहेको इन्सेकका अध्यक्ष डा. कुन्दन अर्यालले बताउनु भयो ।

दुप्चेश्वर गाउँपालिका-१, घ्याङफेदीमा २०४९ साउन १६ गते भएको थाई एयर दुर्घटनामा मृत्यु भएकाहरूको सम्झनामा ककनी गाउँपालिका-५, ककनीमा थाई एयर स्मृति पार्क निर्माण गरिएको छ । सोही दुर्घटनामा निधन भएका इन्सेकका संस्थापक महासचिव प्रकाश काफ्लेको स्मृतिमा वृक्षरोपण कार्यक्रम गरिएको हो ।

अनौपचारिक क्षेत्र सेवा केन्द्र (इन्सेक) को आयोजनामा भएको कार्यक्रममा सशस्त्र प्रहरी बल युएन तालिम शिक्षालय ककनीको सहकार्य, शिवपुरी नागार्जुन राष्ट्रिय निकुञ्ज क्षेत्र व्यवस्थापन समिति ककनी ओखरपौवाको समन्वय र ककनी गाउँपालिकाको सहजीकरणमा भएको थियो ।