समाचारहरू

उच्च अदालत पोखराले पोखरा महानगरपालिका–१८ मा ०७९ वैशाख ३० मा भएको स्थानीय तहको चुनावको वडाध्यक्ष पदको मतगणना पुनः गर्न आदेश दिएको छ ।

स्थानिय निर्वाचनमा एमाले उम्मेदवार पुस्कलबहादुर थापालाई हराउँदै कांग्रेसका शिवप्रसाद तिमिल्सिना ३ मतले विजयी भएको घोषणा गरिएको थियो । तर थापाले आफू ९ मतान्तरले विजयी भएको भन्दै पुनः मतगणनाको माग गर्दै जेठ १८ गते उच्च अदालतमा निवेदन दिनुभएको थियो ।

निर्वाचन अधिकृतको कार्यालयले भने शिवप्रसादले १६ सय ४३ र पुस्कलबहादुर थापाले १६ सय ४० मत ल्याएको घोषणा गरेको थियो तर थापाले खसेको भन्दा गणनामा ९ मत कम देखिएको र उक्त मत आफ्नै भएको दाबी गनुभएको थियो ।

मुख्य न्यायाधीश डिल्लीराज आचार्य र ऋषिराज भण्डारीको चैत २१ गतेको संयुक्त इजलासले ०८० वैशाख २० गते पुनः मतगणना गर्न फैसला दिएको हो । उच्च अदालतकै रोहवरमा पुनः मतगणना गर्न आदेश भएको पुस्कलका तर्फबाट बहस गरेका अधिवक्ता सुरेन्द्र थापामगरले जानकारी दिनुभयो साथै मतगणनाको स्थल भने समन्वयमा तय हुने जानकारी दिनुभयो ।

नारायण केसी