समाचारहरू

पूर्वसञ्चार, सूचना तथा प्रविधि मन्त्री गोकुल बास्कोटाको नवनिर्मित घरमा बम बिस्फोट भएको छ । मध्यपुरथिमि नगरपालिका–१ लोकन्थलीस्थित मनोहरा फाँटमा रहेको बास्कोटाको घरमा फागुन २८ गते विहान प्रेसर कुकर बम बिस्फोट भएको हो ।

बम बिस्फोटबाट पूर्व मन्त्री बास्कोटाको घरको पर्खाल र घरको सिसामा क्षति पुगेको महानगरीय प्रहरी वृत्त थिमिका प्रहरी नायब उपरीक्षक शान्तिराज कोईरालाले जानकारी दिनुभयो ।

बम बिस्फोटबाट  बा.१९ च. ४७८१ नम्बरको निजी भ्यानको सिसामा क्षति पुगेको उहाँले जानकारी दिनुभयो । बास्कोटाको घरसँगै रहेको कुबेर केसी, भुवन केसी र कपिल घिमिरेको घरका सिसा समेत फुटेको छ । घटना कसले घटायो भन्नेबारेमा अनुसन्धान गरिरहेको प्रनाउ कोइरालाले जानकारी दिनुभयो ।

स्थानीय कुबेर केसीले बिस्फोटबाट आफ्नाे घरको झ्यालको सिसा, खापाको चौकोस र टेलिभिजनमा क्षति पुगेको बताउनु भयो ।बास्कोटाको घर क्षेत्रमा फागुन २७ गते दिनभर प्रहरीले गस्ती गरेको २८ गते बिहानैदेखि प्रहरीको गस्ती नभएको मौका पारेर बम विस्फोट गराइएको स्थानीयको भनाई छ ।  बम विस्फोट गराउने समूहबारे अहिलेसम्म केही खुल्न सकेको छैन । बास्कोटा मन्त्री भएदेखि नै भक्तपुरको बालकोटस्थित प्रधानमन्त्री केपी शर्मा ओलीको निजी निवासमा बस्दै आउनु भएको छ ।

रमेश गिरी