समाचारहरू

फिक्कल गाउँपालिका-६, रत्नावतीमा पर्ने सोखु खोलामा समयमा पुल निर्माण हुन नसक्दा स्थानीयलाई सास्ती खेप्नु परेको छ । खोलामा वर्षौँदेखी पुल अलपत्र हुँदा वर्षातको समयमा यस क्षेत्रका ज्येष्ठ नागरिक, सुत्केरी, गर्भवती र विद्यालय जाने विद्यार्थीहरू थप जोखिममा रहेका छन् ।

मध्यपहाडी राजमार्गको खुर्कोट-घुर्मी सडकखण्डमा पर्ने सोखु खोलालामा पुल नहुँदा विशेषगरी खोटाङ, ओखलढुङ्गा, सोलुखुम्बु र भोजपुर लगाएतका जिल्लबाट काठमाडौँ र काठमाडौँबाट पूर्वी जिल्लाहरूमा आवतजावत गर्ने यात्रुहरूले समेत सास्ती खेप्नु परेको हो ।

खोलामा आएको बाढीका कारण घण्टौँसम्म बस्नु पर्ने, जोखिममा खोला तर्नु पर्ने बाध्यता रहेको छ । दश वर्ष अघि देखि निर्माण सुरु भए पनि ठेकेदारको लापरबाहीले पुल निर्माण कार्य अलपत्र परेको छ ।

खोलामा आएको बाढीका कारण भोकै बस्नु पर्ने, बिरामीले समयमा नै उपचार नपाउने जस्ता समस्या सिर्जना भएको स्थानीय धनकुमार तामाङले बताउनु भयो । खेलामा आएको बाढीका कारण आठ देखी दश घण्टासम्म थुनिएर बस्नु पर्ने उहाँको भनाई छ । खोलामा पुल नहुँदा यहाँका बिरामीलाई बोकेर अस्पतालसम्म पनि ल्याउन कठिन हुने गरेको स्थानीय तामाङले उल्लेख गर्नुभयो ।

सोखु खोलामा पुल निर्माण गर्ने जिम्मा सुरुमा पप्पु नेपाल प्रगति जेभीले लिएको थियो तर पप्पु नेपालसँग ठेक्का तोडिएपछि वाइपी-विकास एण्ड ब्रदर्श-आत्रेय जेभीले पुल निर्माणको जिम्मा लिएको थियो । आत्रेयले ०७७ कात्तिक २६ गते पुल निर्माणको ठेक्का सम्झौता गरेको पुष्पलाल (मध्यपहाडी) राजमार्ग योजनाको कार्यालय, रामेछापले जनाएको छ । सोही राजमार्गमा पर्ने खाङसाङ खोला र उक्त सोखु खोलाको पुल गरी दुई ओटा पुल निर्माण गर्न ५ करोड ३६ लाख ७७ हजार रुपियाँ (भ्याट बाहेक) मा ठेक्का सम्झौता भएको थियो । आत्रेयसँग सम्झौता गरिएको म्याद पनि ०७९ कात्तिक २६ गते सकिएको पुष्पलाल (मध्यपहाडी) राजमार्ग योजनाको कार्यालय, रामेछापका इन्जिनियर दिपेश मुनाकर्मीले बताउनु भयो ।

स्थानीय बासिन्दाले समयमा नै पुल निर्माण गर्न दवाव दिँदै आएका छन् । स्थानीय सरकारले सरोकारवाला निकायसँग समयमा नै पुल निर्माण सम्पन्न गर्न आग्रह गर्दै आएको फिक्कल गाउँपालिकाका उपाध्यक्ष राजु बरालले जानकारी दिनुभयो ।

सम्बन्धित निकायको गैर जिम्मेवारीपनका कारण सर्वसाधारणले सास्ती खेप्नु परेको उहाँको भनाई छ । वर्षातको समयमा आउने बाढीले मानवीय क्षति नहोस भनेर स्थानीय र जनप्रतिनिधिले जोखिममा साना सवारीहरूलाई खोला तार्ने गरेको छ । नागरिक तथा स्थानीय सरकारले गरेको आग्रहलाई वेवास्ता गर्दा वर्षातको समयमा यात्रुले सास्ती व्यहोर्नु परेको उहाँको भनाई छ । असार मसान्त सम्ममा पुल सञ्चालनमा ल्याउने सहमति भए पनि हाल निर्माणको जिम्मा पाएको कम्पनी सम्पर्क विहिन भएको छ ।

नबिनबाबु अधिकारी