समाचारहरू

पाल्पामा अधिकांश नागरिकहरूले पिउँदै आएका २८ प्रतिशत मुहानको पानीमा ‘इकोली’ जीवाणु भेटिएको छ । जिल्लाका ५२ ओटा खानेपानी योजनाको १ सय १४ ओटा नमुना सङ्कलन गरी गुणस्तर परीक्षण गर्दा २८ प्रतिशत पिउने पानीमा ‘इकोली’ जीवाणु भेटिएको हो ।

तानसेन नगरपालिकामा पाँच ओटा, रामपुर नगरपालिकामा १० ओटा, पूर्वखोला गाउँपालिकामा ६ ओटा, निस्दीका गाउँपालिकामा चार ओटा, रम्भा गाउँपालिकामा सात ओटा, बगनासकाली गाउँपालिकामा पाँच ओटा खानेपानी योजनाको पानी परीक्षण गरिएको थियो ।

त्यसैगरी तिनाउँ गाउँपालिकामा ६ ओटा, माथागढी गाउँपालिकामा दुई ओटा, रैनादेवी छहरा गाउँपालिकामा चार ओटा, रिव्दीकोट गाउँपालिकामा तीन ओटा खानेपानीको नमूना सङ्कलन गरी गुणस्तर परीक्षण गरिएको स्वास्थ्य कार्यालय पाल्पाका प्रमुख डा. राजेन्द्र गिरीले जानकारी दिनुभयो । जिल्लाका दुई ओटा नगरपालिका र आठ ओटा गाउँपालिका गरी ५२ ओटा योजनामा गरिएको परीक्षणमा २० ओटा खानेपानी आयोजनाको पानीमा ‘इकोली’ जीवाणु भेटिएको उहाँले बताउनु भयो ।

५२ ओटा योजनामध्ये १२ ओटा स्वास्थ्य संस्थामा प्रयोग भएको पानीको शुद्धता परीक्षण गरिएकोमा २८ प्रतिशत इकोली जीवाणु भेटिएको उहाँले बताउनु भयो । अहिले पनि स्वास्थ्य संस्थामा प्रयोग भएको पानीमा इकोली जीवाणु भेटिएकाले थप शुद्धिकरण आवश्यक रहेको उहाँले बताउनु भयो । इकोली जीवाणु मानिसको दिसा, बङ्गुर लगायत घरपालुवा जनावरको दिशापिसावमा भेटिने जीवाणु हो ।

यसले हैँजा, आउ, झाडापखाला, पानीजन्य अन्य रोगहरू टाइफाइड, पेट, टाउको दुख्ने जस्ता रोग लाग्ने उहाँले बताउनु भयो । मानिसले दैनिक पिउने पानीको गुणस्तर सुधार गर्न दुई वर्षदेखि पाल्पाका स्वास्थ्य संस्थामा प्रयोग भएका र धेरै मानिसले प्रयाोग गर्ने पानीको गुणस्तर परीक्षण गरिँदै आएको उहाँले जानकारी दिनुभयो ।

यज्ञमूर्ति तिमिल्सिना