समाचारहरू

कर्णाली प्रदेशका हिमाली जिल्ला जुम्ला, हुम्ला, कालिकोट, मुगु र डोल्पा जिल्लामा प्रत्येक वर्ष फागुन पहिलो हप्तादेखि शैक्षिक सत्र सुरु हुने गर्दछ । मङ्सिर अन्तिम हप्तासम्म बार्षिक परीक्षा सकेर एक वर्षको शैक्षिक सत्र सम्पन्न हुने गर्दछ ।

शैक्षिक सत्र सुरु भएको चार महिना भइसक्दा पनि विद्यार्थीले पाठ्यपुस्तक समयमा नपाउदा पठनपाठन प्रभावित भएको छ । समयमै पर्याप्त पुस्तक नहुँदा अधिकांश विद्यालयको पठनपाठन प्रभावित हुन पुगेको हो ।

हिमा गाउँपालिका–१ बड्की गाउँस्थित कालिका माध्यमिक विद्यालय शिक्षक खाम्बा हामीका अनुसार पाठ्यपुस्तक प्रयाप्त नआउदा पुरानो किताबकै भरमा पढाइरहेका छौँ । उहाँले भन्नुभयोे, “कक्षा चार, सात र नौको नयाँ पाठ्यक्रम भएकाले ती कक्षा प्रभावित हुन पुगेका छन् । अन्य कक्षामा त पुरानै किताबले पनि पठनपाठन गराइएको छ ।

त्रैमासिक परीक्षा सुरु हुने बेलासम्म पनि विद्यार्थीको हातमा पुस्तक उपलब्ध नभएको विद्यार्थी र शिक्षकको गुनासो छ ।

जुम्लामा १ सय २३ आधारभुत र ४७ माध्यमिक विद्यालय छन् । ३१ हजार भन्दा बढी बालबालिका सामुदायिक विद्यालयमा अध्ययनरत छन् ।
नयाँ शैक्षिक सत्र सुरु भएको चार महिना बितिसक्दासमेत कर्णालीका सामुदायिक विद्यालयका विद्यार्थीले अझै पुस्तक पाएका छैनन् । जनक शिक्षा सामग्री केन्द्र, स्थानीय तह र विद्यालयहरूबीच समन्वय नहुँदा पुस्तक ढुवानी प्रभावित बनेको हो ।

सामुदायिक विद्यालयका पुस्तक बिक्रीकर्ता जिपि स्टेशनरी जुम्लाका प्रोप्राइटर गणेश रोकायाका अनुसार जुम्लामा पाठ्यपुस्तक अपुग नै छ । विद्यार्थीको मागका आधारमा पाठ्य पुस्तक माग गरेका हुन्छौ तर जनक शिक्षा सामग्रीले समयमा ढुवानी गर्न नसकेका कारण समस्या हुने गरेको छ ।

कर्णालीमा कक्षा आठको स्वास्थ्य तथा शारीरिक शिक्षा विषयको छपाइ कम हुँदा अभाव रहेको बताइएको छ । जनक शिक्षाका प्रादेशिक कार्यालय प्रमुख धनबहादुर केसीले स्थानीय तह र विद्यालयहरूबीच पाठ्यपुस्तक ढुवानीमा आपसी समन्वय नहुँदा विद्यार्थीले समयमै पुस्तक पाउन नसकेको बताउनु भयो । पुस्तक हुँदाहुँदै पनि खरिद तथा ढुवानीमा स्थानीय तह र विद्यालयले बेवास्ता गरेको उहाँको भनाइ छ ।

जनक शिक्षाका प्रादेशिक कार्यालय प्रमुख केसीले भन्नुभयोे, “सुर्खेत, दैलेख, कालीकोट, जुम्ला र जाजरकोटमा सुर्खेतबाटै पठाइएको छ ।” जनक शिक्षाका अनुसार कालिकोटमा तीन हजार सेट, दैलेखमा ४ हजार ५ सय सेट, जाजरकोटमा ४ हजार सेट, सुर्खेतमा ४ हजार सेट, जुम्लामा २ हजार ५ सय सेट पुस्तक पठाइएको छ । बाँकी किताब छपाइकै क्रममा रहेकाले सुर्खेत गोदाममा आउने बित्तिकै पठाइने प्रादेशिक कार्यालयले जनाएको छ ।

कर्णालीका मुगु बाहेक सबै जिल्लामा पाठ्यपुस्तक ढुवानी प्रक्रिया सुरु भइसकेको छ । पाठ्यपुस्तक छपाइ तथा बिक्री वितरणको जिम्मा पाएको जनक शिक्षा सामग्री केन्द्रले मुगुका चारवटै स्थानीय तहका लागि आवश्यक पुस्तक गोदाममै थन्किएको जनाएको छ ।

केन्द्रको सुर्खेतस्थित प्रादेशिक कार्यालयका प्रमुख केसीले दुर्गम जिल्लालाई प्राथमिकतामा राखेर पुस्तक उपलब्ध गराए पनि स्थानीय तहले खरिदमा बेवास्ता गरेको बताउनु भयो । उहाँका अनुसार मुगुका लागि २४ लाखका पुस्तक तयारी अवस्थामा राखिएको छ । तर खरिद प्रक्रियामा मुगुका सबै स्थानीय तह र विद्यालयहरूले कुनै चासो दिएका छैनन् ।

कर्णाली प्रदेशका डोल्पा, सल्यान, रुकुम पश्चिम र हुम्लाका दुई स्थानीय तहमा नेपालगञ्जबाट ढुवानी भइरहेको छ । नेपालगञ्जबाट पायक पर्ने भएकाले ढुवानीको प्रक्रिया अघि बढिसकेको छ, कतिपय जिल्लामा पुगिसकेको छ भने केही पुस्तक बाटोमै रहेको सुर्खेतस्थित प्रादेशिक कार्यालयका प्रमुख केसीले जनाउनु भएको छ ।

मानदत्त रावल