समाचारहरू

सिमकोट गाउँपालिका–५ स्थित बालमन्दिर माध्यमिक विद्यालयको कक्षा ८ को नेपाली विषयमा दुईवटा पाठ नछापिएर खाली आएपछि बालबालिकाको पठनपाठन प्रभावित भएको छ ।

विद्यालयले खरिद गरेको नेपाली कितावका दुईवटा पाठ नछापिएको खाली भएर आएपछि बालमिन्दर माविका ५६ जना विद्यार्थीको पठनपाठनमा समस्या भएको हो ।

शैक्षिक सत्र सुरु भएको तीन महिनापछि ढिलो गरी पुगेको पाठ्यपुस्तक पनि अधुरो बनेर आएको छ । यस अघि विभिन्न संचार माध्यममा समाचार प्रसारण तथा प्रकासन भएपछि पाठ्यपुस्तक हतारमा छाप्ने कार्य गर्दा समस्या उत्पन्न हुन सक्ने आकलन बालमन्दिर माविका प्रद्यानाध्यापक कैलाश रोकायाले गर्नु भयो ।

जनक शिक्षाको लापरबाहीका कारण पाठको शीर्षक मात्र छापिएर आएको भए पनि अन्य विषयबस्तु नछापिएको प्रद्यानाध्यापक रोकायाले बताउनु भयो । पाठका बिषयबस्तु नछापिएर आएका पाठ मध्ये पाठ ३ को देबकुमारी थापा र पाठ ४ को ग्रन्थ चित्र रहेको प्रअ रोकायाले बताउनु भयो ।

त्यस्तै कक्षा ८ मा अध्यनरत छात्रा अलिस्मा बोहराले यति धेरै गम्भीर त्रुटी हुनु राम्रो नभएको गुनासो गर्नु भयो । शीर्षक मात्र भएर केही गर्न नसकिने बताउँदै पूर्णपाठ नपढी विद्यार्थीले जानकारी लिन नसक्ने छात्रा बोहराको भनाई छ । छात्रा बोहराका अनुसार समस्या समाधान नभई यसभित्र आफुले गर्नुपर्ने क्रियाकलाप गर्न नसकिने भएको छ ।

नन्द सिंह