समाचारहरू

कालिकोटका विभिन्न विद्यालयमा पाठ्यपुस्तकको अभाव भए पछि यहाँका विद्यार्थीको पढाइमा बाधा पुगेको छ । शैक्षिसत्र सुरू भएको ६ महिना बितिसक्दा समेत विद्यालयमा पाठ्यपुस्तक असोज ६ गतेसम्म पनि नपुगेपछि विद्यार्थीहरूको पढाइमा बाधा पुगेको हो ।

पलाता गाउँपालिकामा रहेका कर्णाली मावि खिन, दुधेसिल्ला मावि वेर्सनकोट, देउती मावि उखाडी, कालिका आधारभुत विद्यालय छलाह, सरस्ववती मावि राडुनेटामा कक्षा २ देखि ९ सम्मका विज्ञान, गणित, अङ्ग्रेजी विषयका किताब नपुगेको स्थानीय अभिभावक भरतराज विष्टले बताए ।

यस्तै रास्कोट नगरपालिका अन्तर्गत मोतिराम मावि सिप्खाना, रमा मावि कालासिल्ला, दुदेसिल्ला मावि रकुमा पनि पाठ्यपुस्तकको अभाव रहेको बताइएको छ । वैशाखमा शैक्षिक सत्र सुरू भए पनि चैतमा पाठ्यपुस्तकको माग गरिएको भए पनि जनक शिक्षा, साझा प्रकाशनको ढिलाइका कारण पुस्तक नपुगेको जिल्ला शिक्षा अधिकारी विष्णुप्रसाद तिवारीले बताए ।

विद्यालयमा पुस्तक नै नभएपछि एक हप्ता अगाडि नै दसैँ विदा गरेर विद्यालय बन्द गर्नु परेको जनज्योति मावि पाँखाका प्रधानाध्यपक दुर्गा भट्टले बताए ।

कालीबहादुर मल्ल