पाँच महिनादेखि स्वास्थकर्मी नहुँदा गर्भवती महिलालाई सास्ती

 

सिमकोट गाउँपालिका–७ डाँडाफया इलाका स्वास्थ्यचौकीका अनमीद्वय रमिता रोकाया र अनमी बसन्ती रावत पाँच महिनादेखि स्वास्थ्य चौकीमा नहुँदा सेवाग्राही मर्कामा परेका छन् ।

रोकाया एक वर्षदेखि र रावल पाँच महिनादेखि घर विदामा भनी गएर नफर्कँदा गर्भवती महिलालाई स्वास्थ जाँच गराउन समस्या भएको छ ।

दरबन्दी रहेका दुवै अनमी विदामा गएर नफर्कँदा सेवाग्राही महिलाहरू स्वास्थ्य उपचार गर्न एकदिनको पैदल दुरीमा रहेको जिल्ला अस्पताल सिमकोट पुग्नुपर्ने बाध्यता रहेको स्थानीय महिला इसरा सिंहले गुनासो गरिन् ।

डाँडाफया इलाका स्वास्थ्यचौकीमा अन्य रोग तथा समस्याको उपचारका लागि स्वास्थ्यकर्मी भएपनि गर्भवती महिलालाई जाँच गराउने तथा अस्थायी साधनका बारेमा जानकारी दिने स्वास्थकर्मी नहुँदा सामान्य कामका लागि पनि एकदिन पैदल हिँडेर सदरमुकाम जान बाध्य भएको स्थानीय जस्कला शाहीले बताइन् ।

पुरूष स्वास्थकर्मीबाट शरीरको चेकजाँच गराउन र समस्या राख्न स्थानीय महिला हिच्किचाउने भएकाले हाल सो वडाका महिलाले गर्भ निरोधक साधन प्रयोग गर्ने क्रममा समेत समस्या भएको शाहीको भनाई छ ।

दुईजना अनमीको दरबन्दी भएपनि हाल दुवै अनमी भनसुनमार्फत् सदरमुकाम स्थित जिल्ला अस्पतालमा कार्यरत रहेको बुझिन आएको सिमकोट गाउँ कार्यपालिका सदस्य विनोद बिकले बताए ।

सिमकोट गाउँपालिका स्वास्थ्य संयोजक धुर्वराज सिंहले भने समस्या समाधानका लागि दुवै जना अनमीलाई तत्काल स्वास्थ चौकीमा बोलाउने बारे गाउँपालिकाले निर्णय गरिसकेको भएपनि केही प्राविधिक कारणले मात्रै ढिलाइ भएको बताए ।


नन्द सिंह