समाचारहरू

सर्केगाड गाउँपालिका–१ स्थित जैरको छिडिनता सामुदायिक स्वास्थ्य इकाई पाँच महिनादेखि बन्द हुँदा सेवाग्राहीले सास्ती खेपेका छन् । उत्त स्वास्थ्य संस्थामा गत साउनदेखि बन्द हुँदा सो क्षेत्रका स्थानीय नागरिक उपचारबाट बञ्चित भएका हुन् ।

तत्कालीन  कर्णाली प्रदेश सरकारका पूर्वसामाजिक विकासमन्त्री दल रावल मन्त्री भएको वेला स्थापना भएको सामुदायिक स्वास्थ्य इकाईमा हाल सर्केगाड गाउँपालिकाले स्वास्थ्यकर्मी र औषधि  व्यवस्था नगरेपछि सेवाग्रहीलाई समस्या भएको छ ।

स्वास्थ्यकर्मी र औषधिको व्यवस्था नभएकाले  साउन महिनादेखि  तालाबन्दी भएको सर्केगाड गाउँपालिका– १ छिडिनताका मंगल्या कार्मीले गुनासो गर्नु भएको छ । गाउँपालिका अध्यक्ष ठानबहादुर रोकाया र उपाध्यक्ष चन्द्रसिहं कार्कीलाई स्वास्थ्यकर्मी र औषधिको व्यवस्था गरिदिन आग्रह गरे पनि सुनुवाइ नभएको स्थानीय कामीले गुनासो पोख्नु भएको हो ।

२ सय ५ घरधुरी भएको छिडिनाता स्थानीयहरूले बिरामी हुँदा औषधि उपचारका लागि जैर स्वास्थ्यचौकीमा दुई घन्टा पैदल र निजी मेडिकल भएको बालुकुना तीर्थसैना पुग्न तीन घन्टाको समय खर्चिन बाध्य भएको कामीले बताउनु भएको छ ।

सामान्य रुघाखोकी, ज्वरो, टाउको दुखेको समय पनि सामान्य सिटामोल समेत पाउन मुस्किल भएको छ ।  साउन महिनादेखि सामुदायिक स्वास्थ्य इकाइ बन्द भएपछि गाउँबासीले सिटामोलको (टाटो) समेत देख्न नपाएको अर्का स्थानीय रतन रावतले गुनासो गर्नुभयो । रुघाखोकी, ज्वरो, जटिल बिरामी भएपछि दुई घन्टा उकालो पैदल हिँडेर जैर स्वास्थ्यचौकी र बालुकुना, तीर्थसैना मेडिकलसम्म पुग्न बाध्य भएको रावतको भनाइ छ ।

उक्त विषयमा सर्केगाड गाउँपालिका उपाध्यक्ष चन्द्रसिंह कार्कीलाई बुझ्दा उहाँले गाउँपालिकासँग प्रयाप्त आर्थिक स्रोत नभएका कारण सो स्वास्थ्य संस्था बन्द भएको बताउनुभयो ।

नन्द सिंह