समाचारहरू

पाँच महिनादेखि विज्ञान विषयको शिक्षक नहुँदा विद्यार्थीको पठनपाठन प्रभावित भएको छ । सिमकोट गाउँपालिका–५ स्थित बालमन्दिर माध्यामिक विद्यालयमा दरबन्दी भए पनि पाँच महिनादेखि शिक्षकको व्यवस्था नभएपछि विद्यार्थीको पठनपाठन प्रभावित भएको हो ।

विद्यालयमा विज्ञान विषय पढाउने शिक्षक नभएपछि पठनपाठन विनै अर्धवार्षिक परीक्षा दिनु पर्ने बाध्यता रहेको कक्षा १० मा अध्ययनरत छात्रा विपना बोहराले गुनासो गर्नुभयो । अन्य विषय पठनपाठन भएको धेरै समय बितिसक्दा पनि विज्ञान विषय हालसम्म पढाइ नभएका कारण विद्यार्थीको पठनपाठनमा समस्या भएको छात्रा बोहराले गुनासो गर्नुभयो ।

विद्यालयमा विज्ञान विषयको पढाइ पाँच महिनादेखि हुन नसकेपछि सिमकोट गाउँपालिकामा शिक्षकको व्यवस्थाको पहल गर्दा पनि कुनै सुनुवाई नभएको विद्यार्थीले गुनासो गरेका छन् । यस अघि असार २८ गते सो विद्यालयका विद्यार्थीहरूले शिक्षकको माग राखेका थिए । तर हालसम्म माग पुरा नभएको बालमन्दिर माध्यामिक विद्यालयका प्रधानाध्यापक कैलाश रोकायाले बताउनु भयो ।

नयाँ शैक्षिक सत्र सुरु भएको सात महिना भइसकेको छ । तर ५ महिनादेखि विज्ञान विषयको शिक्षक भर्नाका लागि गाउँपालिकाले अनुदानको व्यवस्था पनि गरेको थियो । गाउँपालिकाको अनुदानमा विज्ञान र गणित शिक्षक राख्न बजेटको व्यवस्था गरे पनि हालसम्म विद्यालयले विज्ञापन गर्दा समेत कसैको पनि आवेदन नपरेको उक्त विद्यालयका प्रधानाध्यापक रोकायाले बताउनु भयो ।

दुई पटक विज्ञापन गर्दा पनि शिक्षक अध्यापन अनुमति पत्र प्राप्त भएका कसैको पनि आवेदन नपरेकाले विज्ञान विषयको शिक्षक भर्ना गर्न नपाएका कारण ५ महिनादेखि पढाइ हुन नसकेको प्रधानाध्यापक रोकायाले स्वीकार गर्नुभयो । उहाँका अनुसार शिक्षक अनुमति पत्र प्राप्त गरेको बिएसी पढेको जिल्लामा नपाएकै कारण दुई पटक विज्ञापन गर्दा जिल्लाभित्र र बाहिरबाट आवेदन नपरेकाले समस्या देखिएको छ । गाउँपालिका अध्यक्ष विजय भण्डारीले तत्कालका लागि अस्थायी शिक्षकको विकल्प गाउँपालिकाले गरिदिने प्रतिबद्धता जनाउनुभयो ।

नन्द सिंह