समाचारहरू

चन्दननाथ नगरपालिकामा स्वास्थ्य सेवा प्रवाह गर्ने स्वास्थ्यकर्मीहरुले गत वर्ष फागुन महिनादेखि तलब भत्ता नपाएको गुनासो गरेका छन् ।

चालु आर्थिक वर्ष ०८०/०८१ को खाता बन्द गर्न एक साता मात्रै बाँकी रहेको छ । तर स्वास्थ्यकर्मीको तलब भत्ताका लागि रकम निकासा नआएर तलब भत्ता नपाएको चन्दननाथ नगरपालिका स्वास्थ्य शाखाका जनस्वास्थ्य निरीक्षक क्षेत्रबहादुर महतले गुनासो गर्नु भयो ।

उहाँले भन्नुभयो ‘अहोरात्र खटिएर ८० प्रतिशत स्वास्थ्य सेवा प्रवाह गर्ने स्वास्थ्यकर्मीले लामो समयसम्म तलब भत्ता नपाउनु दुखद पक्ष हो । ’
चन्दननाथ नगरपालिकामा स्वास्थ्य सेवा प्रवाह गर्ने स्थायी २९ जनासहित यहाँको आठ ओटै स्थानीय तहमा कार्यरत २ सय जना स्वास्थ्यकर्मीले ०८० फागुन महिनादेखि तलब भत्ता नपाएको जनस्वास्थ्य निरीक्षक महतले बताउनु भयो ।

स्वास्थ्य तथा जनस्ख्या मन्त्रालयले स्थायी स्वास्थ्यकर्मीका लागि अपुग तलब भत्ता जेठ २८ गते माग गर्दा पनि अर्थ मन्त्रालयले चालु आर्थिक वर्ष समाप्त हुन लाग्दा पनि रकम निकासा नगरेको उहाँले बताउनु भयो ।

चन्दननाथ नगरपालिका जुम्लाका प्रमुख प्रशासकीय अधिकृत धर्मराज न्यौपानेका अनुसार तलब भत्ताको रकम निकास नआएकोले स्वास्थ्यकर्मीलाई उपलब्ध गराउन सकिएको छैन । उहाँले भन्नुभयो असार २० गतेसम्म निकासा आउने भन्ने छ । निकासा आएपछि एकै पटक पाँच महिनाको तलब उपलब्ध गरिने छ ।

मानदत्त रावल