समाचारहरू

फालेलुङ गाउँपालिका-५ डाँडागाँउमा भदौ १३ गते विष्फोट हुँदा दुई वर्षीया बालिका र ११ वर्षीय बालकको मृत्यु र अन्य दुई बालकहरू घाइते भएको घटनाका बारेमा इन्सेक र सिविनले राष्ट्रिय मानव अधिकार आयोगको ध्यानाकर्षण गराएका छन् ।

ध्यानाकर्षणपत्रमा "सिविन नेपाल र इन्सेकले संयुक्तरूपमा गरेको तथ्य संकलनका आधारमा पाँचथर घटनामा आहत ४ जना बालबालिकाको उपचारको लागि स्थानीय स्वास्थ्य चौकी, फिदिम जिल्ला अस्पताल, धरान स्थित वि पी. कोईराला स्वास्थ्य विज्ञान प्रतिष्ठान र कोशी प्रादेशिक अस्पतालसम्म पुऱ्याउन प्रयास गरिएकोमा प्रिन्सा र दिपसनले बाटोमा नै मृत्युवरण गरेको र अर्का गम्भीर घाइते दिपसन राई (७) र पवन राई (११) लाई क्रमशः धरान स्थित विपी कोईराला स्वास्थ्य विज्ञान प्रतिष्ठान र कोशी प्रादेशिक अस्पतालमा लगिएको देखिन्छ। यसक्रममा कसैको सहयोगबिना पवनकी आमा र दिपसनका बाबाले आ-आफ्‌ना छोराहरूलाई अस्पताल लगेकोमा घाइतेहरूलाई आर्थिक अभावकै कारण घर फर्काएर लगेको र स्थानीय प्रहरीको सहयोगमा पुनः फिदिम जिल्ला अस्पतालमा भर्ना गरिएको पाइएको छ । यसरी सघन उपचारको आवश्यकता रहेका बालकहरूलाई सिविन नेपाल र इन्सेकका प्रतिनिधिहरू घटनास्थल पुगेपछिमात्र र उनीहरूकै सहजीकरणमा फिदिम जिल्ला अस्पतालबाट भाद्र १९ गते काठमाडौं ल्याई कीर्तिपुर अस्पतालमा उपचारको व्यवस्था मिलाइएको उल्लेख छ ।"

त्यसैगरी "सिविन र इन्सेकका प्रतिनिधि घटनास्थल पुग्नु अगाडिको सरकारी तथा सम्बन्धित निकायको उदासिनताले भने गम्भीर प्रश्नहरू खडा गरेका छन् । घटनापछि परिवारलाई नै जिम्मा लगाएर अस्पताल पठाउने बाहेक ती गरीब र अबोध परिवारलाई कुनै निकायले पनि ठोस सहयोग पुर्‍याए‌को पाइँदैन र अस्पताल पुऱ्याइएका बालकहरूलाई घरै फर्काएर लैजानु पर्ने अवस्था सिर्जना भएको देखिन्छ। यसरी आहत परिवारलाई परेको यस विपत्तिमा कसैले ध्यान नदिनु र राज्यले अभिभावकत्व नलिनु गम्भीर चिन्ताको विषय हो। द्वन्द्वकालीन अवशेषबाट भएको यस घटनालाईसामान्य तरिकाबाट बुझ्‌ने र घाइतेको उपचारमा समेत लापर्वाही भएको पक्ष गम्भीर समीक्षाको विषय बन्नु पर्दछ र दोषीहरू कार्वाहीको भागी बन्नु पर्दछ" ध्यानाकर्षणपत्रमा उल्लेख छ ।

घाइते बालकहरूको उपचार भइरहेको कीर्तिपुर अस्पताल र बालकहरूको अवस्थाका बारेमा इन्सेक र सिविनले अस्पतालका कार्यकारी निर्देशक गौरी प्रधान, चिकित्सकहरू तथा पीडित परिवारसँग भेटघाट गरेका छन् । डा. शंकरमान राईका अनुसार घाइते बालकहरुको शल्यकृया गरिएको र उनीहरुको अवस्था सुधारोन्मुख छ ।

अनलाइनडेस्क