समाचारहरू

फालेलुङ गाउँपालिका-५ डाँडागाँउमा भएको विष्फोटमा तीन जना बालक र एक जना बालिका गरी चार जना घाइते भएको प्रहरीले जनाएको छ ।

विष्फोट पदार्थ भदौ १३ गते विष्फोट हुँदा  फालेलुङ गाउँपालिका-५ का ११ वर्षीय बालक दिप्सन सावा, दुई वर्षीया बालिका प्रियसा सावा, ११ वर्षीय बालक पवन राई र सात वर्षीय बालक दिप्सन राई घाइते भएको जिल्ला प्रहरी कार्यालयका डिएसपी हेमन्त भण्डारीले बताउनु भयो ।

विष्फोट परी घाइते भएकामध्ये ११ वर्षीय दिप्सन सावा र दुई वर्षीया बालिका प्रियसा सावालाई थप उपचारका लागि झापाको विर्तामोडस्थित वि एण्ड सी अस्पताल रेफर गरिएको प्रहरीले जनाएको छ ।

११ वर्षीय बालक पवन राईको जिल्ला अस्पतालमा उपचार भइरहेको छ ।  सात वर्षीय बालक दिप्सन राईको फालेलुङ गाउँपालिका-५ स्थित प्राङबुङ स्वास्थ्य चौकीमा उपचारपछि घर पठाइएको प्रहरीले जनाएको छ ।

विष्फोट परी घाइते परी चार जना बालबालिका घाइते भएको फालेलुङ गाउँपालिका-५ वडाध्यक्ष भरतबहादुर खपाङ्गीले बताउनु भयो ।

प्रहरी घटनास्थलमा पुगेपनि के कति कारणले र के विष्फोट भएको त्यसको यकिन विवरण प्राप्त भइ नसकेको प्रहरीले जनाएको छ ।

घटनाका विषयमा अनुसन्धान थालिएको प्रहरीले जनाएको छ ।

इवारा जवेगु लिम्बू