समाचारहरू

आगामी मङ्सिर ४ गतेका लागि तय गरिएको प्रदेशसभा र प्रतिनिधिसभा निर्वाचनका लागि जिल्लाका ३४ ओटा मतदान केन्द्र अति सम्वेदनशील रहेको जिल्ला सुरक्षा समितिले निश्कर्ष निकालेको छ ।

सुरक्षा सम्वेदनशीलताका दृष्टिकोणले मतदान केन्द्रको वर्गीकरण गर्ने क्रममा जिल्लाका १ सय २ ओटा मतदान केन्द्रमध्ये ३४ ओटा मतदान केन्द्र अति सम्वेदनशील रहेको निश्कर्ष सुरक्षा समितिको छ ।

जिल्ला सुरक्षा समितिको बैठकले जिल्लाका ३४ ओटा मतदान केन्द्रलाई अति सम्वेदनशील, ५८ ओटालाई सम्वेदनशील र १० ओटालाई सामान्यमा वर्गीकरण गर्दै सोही अनुसारको सुरक्षा योजना तर्जुमा गर्दै निर्वाचन सम्पन्न गर्नुपर्ने आवश्यकता औँल्याएको छ ।

वर्गीकरण गरिएका मतदान केन्द्रहरूमध्ये फिदिम नगरपालिकाका नौ ओटा, फालेलुङ गाउँपालिकाका ११ ओटा, तुम्वेवा गाउँपालिकाको एक ओटा, फाल्गुनन्दका गाउँपालिकाको तीन ओटा र मिक्लाजुङ गाउँपालिकाको आठ ओटा मतदान केन्द्र अति सम्वेदनशीलको सूचीमा सूचीकृत गरिएको प्रमुख जिल्ला अधिकारी गणेश गैरेले बताउनु भयो ।

प्रमुख जिल्ला अधिकारी गैरेले फिदिम नगरपालिकाका तीन ओटा, याङवरक गाउँपालिकाका नौ ओटा, हिलिहाङ गाउँपालिकाका ११ ओटा, कुम्मायक गाउँपालिकाका १० ओटा, तुम्वेवा गाउँपालिकाका आठ ओटा, फाल्गुनन्द गाउँपालिकाका १२ ओटा र मिक्लाजुङ गाउँपालिकाका पाँच ओटा मतदान केन्द्र सम्वेदनशील सूचीमा राखिएको बताउनु भयो ।

फिदिम नगरपालिकाका नौ ओटा र याङवरक गाउँपालिकाको एक ओटा गरी १० ओटा मतदान केन्द्र सामान्यको सूचीमा छन् ।

भौगोलिक विकटता, मतदाता र मतदान केन्द्रको दूरी र सुरक्षा पोष्टको पहु‘चसहितका विभिन्न सूचकलाई आधार मानेर मतदान केन्द्रको वर्गीकरण गरिएको प्रमुख जिल्ला अधिकारी गणेश गैरेले बताउनु भयो ।

अति सम्वेदनशील र सम्वेदनशील सूचीमा परेका मतदान केन्द्रमा सोही अनुसारको सुरक्षा प्रबन्ध मिलाइने जिल्ला प्रहरी कार्यालयका सूचना अधिकारी सन्तोष राइले बताउनु भयो ।

सुरक्षा अधिकारीका अनुसार निर्वाचन सामाग्री लैजाने र मतदानसँगै मतदान पश्चात सुरक्षा व्यवस्था प्रबन्ध, जनशक्ति व्यवस्थापन आदिको प्रबन्ध सम्वेदनशीलताका आधारमा गरिन्छ ।

सहमान विश्वकर्मा