पहिरो पीडित परिवारलाई राहत प्रदान

  ०८० असार १२ गते

सिदिङ्वा गाउँपालिका–६ मेहेलका पहिरो पीडित यादव बुढाक्षेत्री र रामवहादुर तामाङ, सिदिङ्वा गाउँपालिका–३ का प्रेम सेलिङ, महेश्वर सेलिङ, डिल्ली सेलिङ र नरेश सेलिङलाई जिल्ला विपद् व्यवस्थापन समितिले राहत प्रदान गरेको छ ।

विपद् व्यवस्थापन समितिको ०८० असार ११ गतेको बैठकले पहिरोमा घर गुमाएका ६ जनाको परिवारलाई जनही १५ हजार रुपियाँ राहत प्रदान गर्ने निर्णय गरिएको थियो ।

सोही निर्णयका आधारमा पीडितहरूलाई तत्काल राहतका लागि नगद प्रदान गर्रिको जिल्ला विपद् व्यवस्थापन प्रमुख तथा प्रमुख जिल्ला अधिकारी गोमादेवी चेम्जोङले बताउनु भयो ।

सिदिङ्वा गाउँपालिकामा अझै नौ ओटा घरहरू पहिरोमा उच्च जोखिममा रहेको विपद् व्यवस्थापन समितिले जनाएको छ ।

सिरीजङ्गा गाउँपालिकामा ३५ ओटा घर पहिरोको उच्च जोखिममा परेका छन् । मैवाखोला गाउँपालिकामा नौ ओटा घर उच्च जोखिममा छन् ।

विपद् व्यवस्थापन प्रमुख तथा प्रमुख जिल्ला अधिकारी गोमादेवी चेम्जोङले हेलिकप्टरबाट औषधि र त्रिपाललगायत सामाग्री वितरण गरिएको बताउनु भयो ।

सङ्घीय तथा प्रदेश सरकारले नगद दिने राहत अझैसम्म प्राप्त हुन सकेको छैन् । जिल्लामा पहिरोमा परेर तीन जनाले ज्यान गुमाउनु परेको छ । तीन जना वेपत्ता छन् । सिदिङ्वा गाउँपालिका–६ मेहेलका राजकुमार राईको विराटनगरस्थित न्यूरो अस्पतालमा उपचार जारी छ ।

सिदिङ्मा गाउँपालिका उपाध्यक्ष कृष्ण कुमारी कडरियाले गाउँपालिकाको वडा–६, ७ र ३ सबैभन्दा बढी पहिरोले प्रभावित बनाएको बताउनु भएको छ । उपाध्यक्ष कडरियाले ‘पहिरोग्रस्त क्षेत्रमा पुगेर हेर्दा मन अड्याउन कठिन छ । न घर छ, नत जग्गा नै ।’ पहिरोले बचेका जग्गामा ध्वजा फाँटेको छ । स्वास्थ्यचौकी,बाटो र पुल क्षति गरेकाले आवतजावतमा समस्या भएको उहाँको भनाइ छ ।


देवराज गुरुङ