समाचारहरू

अन्नपूर्ण गाउँपालिका–३ सुवा गाउँमा पहिरोका कारण विस्थापित भएका ११ घर परिवारका ४० जनाले वडा कार्यालयको भवनमा शरण लिएका छन् ।

सुवा गाउँका सतबिर पाइजाको घर पहिरोले बगाएपछि उहाँको पाँच जनाको परिवार बेघर बनेको छ । घर पहिरोले बगाएपछि पुर्जाको परिवार वडा कार्यालयको भवनमा शरण लिनुभएको हो । पीडित पाइजाको परिवारलाई जिल्ला विपद् व्यवस्थापन समिति मार्फत राहत सामग्री एक सेट उपलब्ध गराइएको वडा अध्यक्ष रमेश पुर्जाले बताउनुभयो ।

त्यस्तै सोही स्थानका अन्य १० परिवारका ४० जना पनि उच्च जोखिम भएको कारणले गर्दा वडा कार्यालय दानाको भवनमा शरण लिएको वडा अध्यक्ष पुर्जाको भनाई छ ।

१० परिवारको घर उच्च जोखिमपूर्ण अवस्थामा रहेकाले वडा कार्यालयमा बस्ने व्यवस्था गरिएको उहाँले बताउनुभयो । दिनमा गाउँमा गएर पशु चौपाया हेर्ने र सुत्न तथा खानका लागि वडा कार्यालयमा आउने गरेको उहाँको भनाई छ । पुर्जाका अनुसार अन्य थप १० घर पनि जोखिममा रहेकोले चनाखो रहनका लागि जानकारी गराइएको छ ।

प्रमुख जिल्ला अधिकारीले जोखिमको क्षेत्रमा सशस्त्र प्रहरीबलको एपिएफ टोली पठाएर उद्धारका लागि सहजीकरण गरिदिनुभएको अध्यक्ष पुर्जाको भनाई छ । दानाको सुवासँगै पुलिबाङ, फगाम, कमेरेडाँडा, तितरलगायतका ठाउँमा समेत पहिरोको जोखिम बढेकोे वडा अध्यक्ष पुर्जाको भनाई छ ।

पहिरोले उच्च जोखिममा रहेका १० घरपरिवारलाई गाउँपालिका र जिल्ला विपद् व्यवस्थापन समितिको पहलमा दानामा लगेर सुरक्षित स्थानमा स्थानान्तरण गरिएको छ । पानी पर्ने क्रम नरोकिएकाले विस्थापित भएका परिवारलाई पुनः स्थापित गर्न अझै केही समय लाग्ने पुर्जाले बताउनुभयो ।

अमृतप्रसाद पौडेल